NAMA PANGGELAN

NAMA PANGGELAN ATAWA SEBUTAN

SUDAH DIBACAKAN DI ACEH TV PADA SABTU MALAM, 22 MARET 2014

MEUNYOE TATULEH NAN GATA GURU

TINGKAH NGON LAKU BEUNA TAJAGA

SURI TOLADAN BEUJEUT GOB TIRU

TABACA BUKU KEUBAHAN AJA

MEUNYOE TATULEH NAN GATA TEUKU

KEUREUJA BABU BEK ROH DIGATA

SOPAN NGON SANTON LEUMBOT TAMEUSU

MEUHAN INDATU MALEE LEUPAHNA

MEUNYOE TATULEH NAN GATA TEUNGKU

SARAF NGON NAHU, MUFOM AGAMA

BEUJEUT KEU IMUM PAJAN UREUNG YU

 KIFAYAH FARDHU UROSAN GATA

MEUNYOE TATULEH NAN GATA ABU

 SA DEUNGON TUENGKU WAJEB BAK GATA

BIJEH ULAMA JAMEUN LON TUPUE

JEUT DONG KEUGURU RANGKANG GEUPUGA

MEUNYOE TATULEH NAN GATA POECUT

SUARA LEUMBUT, MAMEH IE RUPA

MEUTUTO GASA BEH ROOH TASEUBUT

TEULADAN BEUJEUT KEU KAWOM HAWA

MENYOE TATULEH NAN GATA SAYED

BEK THAT TATILET UROSAN DONYA

SUNGGUH IBADAT SUNAT NGON WAJEB

SEUBAB NEUAPET SUKEE SAIDINA

MENYOE TATULEH AJA SYARIFAH

TAJAGA LIDAH AURAT BEK BUKA

BEK MALEE ALI DEUNGON FATIMAH

BANDUM SAIDAH SINAN PHON PUNCA

MEUNYOE HAN SANGGOP LAGEE MEUSURAH

NEUSAMPOH BAGAH TAMBAHAN NAMA

BEK SALAH SANGKA UREUNG DUM GUNDAH

NILAI SEJARAH REULOH BUT GATA

BANDUM SEUBUTAN NYANGKA LON SURAH

ALHAM DULILLAH JAMEUN KON KANA

JINOE DI ACEH KA LAEN KISAH

TEUNGKU JIPEUGAH KON KEU ULAMA

JIMEUHOI ABU KEU UREUNG JUAH

JIHOI SYARIFAH KEU UREUNG KAYA

JIMEUHOI AMPON UREUNG TUENG UPAH

POECUT JIPEUGAH KEU UREUNG JAWA

HABA LON RIKA KAREUNA ALLAH

LON KEUN PEULEUMAH LAM FENOMENA

BAK HANDAI TOLAN LON LAKEE MEUAH

KOMENTAR CEUDAH LON PREH BAK GATA

KUTA RADJA,     MARET 2014

SALEUM:   CUT LEM MAREUJAN