CA'E RINDU

C  A ‘E    R  I  N  D  U

SUDAH DIBACAKAN DI ACEH TV SABTU MALAM,      MEI  2014

Salam ‘alaikom warahmatuhu

Sambot hai teungku beusama rata

Lon mubri saleum sunat “hukmuhu”

Neujaweub laju bek jeut keu desya

Keu muqaddimah beda sigitu

Bak akhe teungku ulon seumapa

Malam ka jula listrek mantong hu

Bek jan hai abu lagee nyang kaka

Judul lon tuleh Keudeh lon tiru

Bak “LAGU RINDU” tembang asmara

Mangat teubuka mata nyang sayu

Bacut lon rayu aneuk remaja

Meunoe tapuphon mangat jitem eu

Channel bek laju jituka-tuka

Suai asmara bacut taramu

Leuhnyan tabahu suai agama

Rihon lam bathen meuchen sipeupeu

Sang sang kadeuh eu dilikeu mata

Tulesan Kangen na sit lam buku

Bandum nyan teungku areuti sama

Ladum u gampong geupeugah rindu

Di rantoe teungku mita beulanja

Poma ngon ayah tamah ngon nek tu

Sabee tarindu sipanjang masa

Ngon keluarga jereung bertemu

Rihon menggebu tiep-tiep kutika

Teubayang-bayang sangsang ka dikeu

Teuingat dumpeu keu nostalgia

Di aneuk muda laen lom laku

Kangen ngon Rindu keu aneuk dara

Cinta  gelora pujangga ramu

Rasa cemburu bunga asmara

Suami istri rihon ngon rindu

Bah tuha umu hana meubeda

Meunyoe meupisah meusigoe minggu

Rasa seuwindu tan geunging rupa

Dalam seuneungeut ka jiteubitsu

Seubut namamu di dalam lena

Meunan ibarat ulon boh miseu

Meumacam laku geutanyoe rasa

Haba lon teugon geuhon u likeu

Hakekat rindu nikmat Rabbana

Meunan keuh fitrah Allah peulaku

Cinta geutabu lam baten hamba

Ureung Iseulam Idam Rabbuhu

Ingin bertemu dengon Rabbana

Keu curga lapan tanyoe pih rindu

Dak jeut bek geuhu dalam nuraka

Seureng tadeungoe di dalam lagu

Han jitem meusu jaroe wi saja

Menyoe ngon uneun hana meu adu

Bertepuk tentu tanpa suara

Meunan sit tanyoe meunyoe tarindu

Peukeuh si   ANU rindu keu gata?

Menyoe si  DIA  hana jirindu

Bertepuk tentu sebelah saja

Ceuruga lapan nacit meurindu

Meunan lam buku kitab ulama

Nabi meusabda lam hadits neu eu

Bukon hai teungku lon peuna-peuna

Peut boh golongan nyang syurga rindu

Soe-soe nyang naksu neu ikot sabda

Menyoe han meunan wahei e abu

Sorga tak mau rindukan anda

Golongan nyang phon curuga rindu

AL-QUR’AN  laju sabee di baca

Teuma keudua ureung tem bantu

Ka  JI TEM BRI BU keu ureueng hana

Teuma nyang keu lhee lagee nyan lon eu

Jroh bak jimeusu LIDAH DIJAGA

Keupeut puasa lagee nyang geuyu

RAMADHAN SAUMU jitem keurija

Meunan lon baca di dalam buku

Bek langsong teungku laju peucaya

Neucok haba lon jak tanyong laju

Neujak bak teungku atau ulama

Ca’e lon karang kadang meubahu

Lon cuba tiru pujangga lama

Geupasoe dakwah di dalam lagu

Tujuan sipeu mudah dicerna

Meunyoe meusalah neubantah laju

Haba neu tuju keu lon nyang hina

Kritik ngon saran lon peuhah qalbu

Mangat lon tupeu kiban nyang beuna

Di Tapaktuan na gunong lampu

Cahya meutabu lam laot raya

Mumada ohnoe kalinyoe Abu

Meunyoe na umu ukeu lon gisa

Lon tumpang saleum keu bandum guru

Nyang phon lon tuju keu cek Medya

Keu ceh Sofiyan, Nekdin tat hayeu

Katrep lon tupeu ahli seumapa

Keu Ayah Muda, saleum lon pangku

Ca’e geuramu bumbu jenaka

Teungku Samuti pih saboh hayeu

 Rafi deuh ta eu  ngon Khaidir Buga

Mukhlisin Albasyarah ka ulon tupeu

Peulom hai Teungku keu Ceh Min Cakra

Bak Abi Daod Balah goh lon eu

Goh lom geusaweu lon dalam sastra

Demikian Assalamu ‘Alaikum Warahmatullahi Wabarakatuh.

Kuta Radja, 01 Mei 2014

Saleum.

Cut Lem Mareujan