RAMADHAN MUBARAK
------------------------------
By: Cut Lem Mareujan
Inong ngon agam rakan meusanjak
Keu bapak ibu teungku ngon cutbang
Hana bedaan cutpoe ngon cutkak
Ka padup minggu buhu bak lon tan
Bokon hai tolan bosan ulon jak
Seubab lon pike sabe keu rakan
Jeut na ruangan saban geuhayak
Keu aneuk muda na keusempatan
Maka lontuan piyoh sijeunak
Tapi Cek Medya geuba sinderan
Geukheun lontuan Pehbuk peulikak
Hingga han seumpat intat karangan
Padahai gobnyan troh jak ngon tapak
Tapi malam nyoe keunoe na sajan
Dak hana simban karang lon peusak
Meukeusud hate ulon bre timphan
Kadang bak rakan rasa jeuleupak
Dak leughok basi lon bri keu rakan
Neu anggap tolan lon bri martabak
Aneuk leuk kutru ateuh mu pisang
Cot uroe timang sayeup jikeuprak
Bandum pujangga sapa lontuan
Sigoe balasan jaroe ulon grak
Jinoe lon balah kisah neulayang
Alaikom salam jaweub seureuntak
Dilon ngon gata bekna jeut hutang
Dosa bak tuhan oh uroe keulak
Peulom ukeu nyoe tanyoe meusajan
Sambot ramadhan ngon hate galak
That
istimewa nama geupenan
Geukheun buleun nyan SAUMUL MUBARAK
Nabi meusabda masa saboh jan
Khusus keu insan geupulang lapak
Pahla geu ganda lam ‘ibadatan
Bek ta siakan hai ibu bapak
Ta sambot jamee nyang mee rahmatan
Ureung meu iman bandum beu kompak
Buleun nyang berkah, serta rahmatan
Maghfirah taulan sajan geubukak
Khusus keu hamba jeumba buleun nyan
Ureung meu iman seubutan muthlak
Supaya taqwa jeumba bak tuhan
Tatueng balasan bagi nyang heundak
Dalam sibuleun na saboh malam
Siribee bulan leubeh nyan lagak
Lailatul qadar nama geupeunan
Dalam Al-Qur’an meucuba bukak
Tron malaikat ngon izin tuhan
Tabu rahmatan an fajar nampak
Soe nyang meuteumee lam ‘ibadatan
Dibak malam nyan tattaqun teulak
Cicem rampineung cicung keutapang
Rab bineh kubang aneuk beuruak
Mari tasambot meusajan-sajan
Ngon hatee lapang curang tatulak
Bacut lon bahu buhu pih saban
Walaupun rakan keun haba lawak
Tapi manfaat kadang na sinan
Beuget that tapham bek salah simak
Ulon booh contoe adoe Septyawan
Lawetnyoe jeut prang meutimbak-timbak
Ngon Cut Hap Montes kontes karangan
Jinoe gencatan bandua pihak
Kadang ngon Nek Din pih na saboh jan
Panton sinderan sikrak dua krak
Deungon Yah Muda pih na meutak tam
Beudee mainan jeut sak lam kotak
Oh leuh puasa tapuga teuman
Leuh jabat tangan ca’e lom tasak
Haba meuguna teuma takarang
Adak lam wayang dakwah ta peujak
Wahee syedara wareh ngon rakan
Kaseb keuh ohnan hana trooh sibak
Keu gura-gura lon timbak gobnyan
Bek keu lontuan neukeun teukeuchak
Lon lakee meu’ah bak handai tolan
Nyang phon Pak Dahlan ureung poe lapak
Krew Aceh TV inong ngon agam
Bandum karyawan sapa sireuntak
Keu Cek Medya saleum khususan
Teuleuh nibaknyan cit keu ma sinyak
Teungku Samuti ngon Ceh Sofiyan
Bandum pengarang cut bang ngon cut kak
Khusus keu Ceh Min sayang that gobnyan
Beu sihat badan meuteumee syifak
Keu Leubee Muda tan keutinggalan
Seubab Teungku nyan leupah le lawak
Saleum that mameh keu sidroe rakan
Cek Dun uroenyan bak lon han trooh jak
Pengarang laen tan ketinggalan
Ca’e ka panyang lon REM mendadak
Meu’ah lon gadee lakee bak rakan
Kadang karangan ulon rooh cangklak
Neupeumeu’ah lon luwa ngon dalam
Tamong ramadhan dosa tasamak
Bungong tapula di dalam taman
Haroom bebewan deungon seumerbak
Mumada ohnoe lon top karangan
Deungon wassalam jinoe ka lon jak
Kuta Radja, 05 Juni 2015
Wassalam
Cut Lem Mareujan
Tidak ada komentar:
Posting Komentar