CA'E SEUBAGOE MEDIA DAKWAH

CA’E SEUBAGOE MEDIA DAKWAH

SUDAH DIBACAKAN DI ACEH TV SABTU MALAM, 19 APRIL 2014

Assalamu ‘alaikum warahmatullah

Jaroe dua blah ateuh jeumala

Seulaweut saleum keu Rasullullah

Meunan cit sahbah ngon keluarga

Saleum horeumat bacut lon tamah

Keu muqaddimah rakan lon sapa

Keu Cek Medya teuntee ka jeulah

 Saleum uquah mandum pemersa

Teungku Samuti, saleum lon balah

Minggu ka leupah ulon geusapa

Peungarang ca’e jeut-jeut daerah

Dek Rafi tamah dengon Yah Muda

Ca’e bak jamboo hayeu sileupah

Haba geupeugah di dalam sastra

Peungarang laen ukeu lon peugah

Hansep keureutah sigoe lon sapa

Lon angkat salut rakan meutuah

Karena Allah geupeuget sastra

Hana geuharap keujeurih payah

Tapi geupeugah panggelan jiwa

Peukhong budaya indatu keubah

Nilai sejarah rayeuk leupahna

Jameunkon kana konnyoe ban leumah

Trep that sileupah di Aceh kana

Haba lam sastra tujuan jeulah

Media dakwah budaya bangsa

Ramee ulama hukom geusurah

Sya’e geupeugah meubagoe rupa

Watee troh Nabi Nanggroe Madinah

Ngon Syair Indah Sambot Saidina

Badru ‘alaina sang buleun peut blah

Keu Rasulullah jikeun lam sastra

Abdul Muthallib Ca’e that indah

Keulileng ka’bah tingku Saidina

Cucoe Adnan ca’e geu gubah

Seunang sileupah lahee Maulana

Akbaron karim katrep sileupah

Contoh lon peugah nyang sederhana

Kitab nyang laen takalon leumah

Kadang geusurah lam adih maja

Hamzah Fansuri le that keuneubah

Tauhid ngon fiqah tuleh lam sastra

Bagah that mufom dum hukom Allah

Ta afai mudah jilop lam dada

Teungku Seumatang meunoe cit arah

Keu santri dayah geupeugot sastra

Cara meusuci atau thaharah

Le that geu gubah lam bentuk sastra

Syeh Muda Waly pihna keuneubah

Syair that indah jeut keupusaka

Tauhid tashaoh teumboh geupegah

Mursyid silsilah mudah tabaca

Thariqat Syatari ngon Naqsyabandiyah

Le that geusurah lam bentuk sastra

Bapak Rohani geuboh istilah

Jinoe  geutamah  Abuya Djama

Zikir seulaweut ngon samadiah

Tahlil geusurah sajan ngon doa

Di dalam sastra kageuterjemah

Leupah that indah geususun kata

Panduan Zikir Buku ka leumah

Sari tilawah lengkap ngon do’a

Mangat tabaca cara  ibadah

Bahasa indah mudah tacerna

Meunyoe neunaksu keu buku cidah

Assasunnajah kenan neuteuka

Di  Ateuk Lueng ie geupuga dayah

Yohgoh musibah awai di Lhoknga

Jinoe meukeusud lontuan peugah

Ca’e keuneubah phon bak ulama

Dalam geusyiar agama Allah

Media dakwah teupat that guna

Tanyoe meuharap bak pemerintah

Jaga beubagah yoh gohlom jula

Peukong budaya tumasok tugah

Rakyat ta arah cinta budaya

Budaya ca’e mantong lam darah

Rata Daerah le that pujangga

Tinggai neuhimpon lam saboh wadah

Program beujeulah bek asai kana

Jeut neu eu contoh bapak meutuah

Bakat le leupah bak aneuk muda

Tapi lantaran hana soe arah

Bakat lam darah salah peuguna

Aneuk sireudeng dalam krueng beukah

Tajeu beubagah yoh goh ie raya

Meunyoe atadroe tan tapeuleumah

Teuntee jiramah budaya luwa

Miseu na program bak pemerintah

Neuci yu gubah lam bentuk sastra

Bak Cek Medya contoh ka leumah

Lagee geu peugah bak layeu kaca

Suai Narkoba Hate teuh gugah

Kalangan bawah mudah dicerna

Jeut cit tacuba bak lampu mirah

Tertip ta arah bak jalan raya

Ohnoe keuh mantong haba lon peugah

Bak pemerintah peuduli beuna

Peungarang Ca’e ramee sileupah

Media Dakwah phon jameun raja

Sinyak top teupong peuget juadah

Keu mangat babah Jeuleupak beuna

Judul Ca’e nyoe Media Dakwah

Lon lakee meu’ah patpat nyang cupa

Kuta Radja, 18.04.2014

Wassalam,

Cut Lem Mareujan