B'EK THAT TADEUNGOE TEUNGKU MAJALAH

B’EK THAT TADEUNGOE TEUNGKU MAJALAH

----------

By: Cut Lem Mareujan

Assalamu 'alaikom warahmatullah
Jaroe dua blah ateuh jeunulang

Nyang pertama phon tapujoe Allah

Keu rasulullah seulaweut salam

Peungarang ca’e saleum lon balah

Katreip sileupah tan lon keumarang

Lon deungoe saleum keulon geuruah

Hatee lon teuhah teurasa seunang

Keu Cek Medya jinoe lon balah

Ulon peu singgah keu Ceh Sofiyan

Keu Ceh Min Cakra saleum ukhuah

Pak Amir Hamzah ulon meukeusan

Cek Dun Baroena saleum ikheulah

Jinoe lon balah atra uroe nyan

Keu Ayah Muda Cut Hab lon tamah

Nek Din meutuah peu kana gagang?

Tgk Samuti wahee e ayah

Sibok sileupah bak percetakan

Di Simpang Mesra Grafika teuhah

Baroe ka leumah lon nging di sinan

Teristimewa dudoe lon peugah

Direktur Gagah cit Bapak Dahlan

Bandum Pengarang singoh lon tamah

Mangat bek sahbah ca’e  that panyang

Lon peugah bacut jum'at ka leupah
Ngon izin Allah lon di Baiturrahman
Sajan meudzikei dalam jama'ah
Selaweut tamah ateuh jonjongan

Tgk. Samunzir ureung bri arah

Bandum jama’ah ikot meusajan

Mualai leuh ‘isya puphon ngon da’wah

Dzikir shalawah do’a akhiran

Nyang ulon rasa leupah that indah

Lon nging jama’ah puteh seuragam

Leupie lam hatee teunang meutamah

Siteungoh siblah ka geusudahan

Di sampeng baknyan na sit tausiah

Sinan geusurah dalam seulingan

Ulama jemeun ta napak tilah

Baldatun thaibah nibak masanyan

Trooh bak hikayat pihna geusurah

Atra keuneubah ulama zaman

Kisah aneuk glueh conto lon peugah

Ulama gubah sabda jonjongan

Ta ulang teuma lagee ka leupah

Hingga ukhuah tanyoe that timang

Karu sabei droe ngon nyoe ta pinah

Saboh jama’ah tapujoe Tuhan

Dipat na mantong nyang na dzikrulllah

Han meuceh sahbah di Baiturrahman

Karena Dzikir perintah jeulah

Alqur’an tamah sabda jonjongan

Jinoe geutanyoe sambong ukhuah

Saboh Aqidah dalam iseulam

Nibak ulama beuna ta langkah

Tatanyong beupah pat kesangsian

Bek kesimpulan keudroe ta ramah

Baca majalah ka deungon koran

Salah tapufom makna teusirah

Ka salah langkah dalam tindakan

Jinoe na ureueng lontuan peugah
Alergi leupah bak but lagenyan
Geupeugah hana bak Rasulullah
Keupeu tatamah kageukheun meunan

Ureueng meudzikei jikeun bideu'ah
Nyang pujoe Allah jikeun kon meunan
Watee takaji ureueng nyang peugah
Mesjid meunasah hantom deuh keunan

Jikeun teuganggu masbuk that sosah
Sang masbuk nyan lah nyang ta utamakan
Seubab jih masbuk hana geupeugah
Kadang bak shalah tan lam pikeran

Kadang peuhabeh rukok bak babah
Tanggong sileupah ban geutot sikhan
Peukeuh nyang meunoe perlee taindah
Hingga tapeugah dzikir gangguan

Ladum na nyang keun hana kloe Allah
Lam hatee geushah gobnyan trooh paham
Hana jiteupeu hatee kreuh leupah
Ngon Kalimah Thayyibah payah tahantam

Nyang leubeh lucu ureueng nyang peugah
Padub goe leupah droneuh ka keunan
Hana meusigoe geujaweub bagah
Pakon jeut pantah that beunci ruman

Neuci jak sigoe hai hamba Allah
Neujak peujeulah peugeulakukan
Meunyoe sit sangsi neu tanyong bagah
Mangat geusurah sumber geupeutrang

Nyang ramee meunan lontuan peugah
Nyang beut majalah atawa koran
Cok kesimpulan meunurot jishah
Ulama nyang pah hana geudatang

Kadang bak kanto tanna lei dinah
Baca majalah le watee luwang
Geutung keu ayat nibak majalah
Hadits geu unggah bak internetan

Ngon otodidak meunan geupeugah
Peu teuma suah ureueng nyang peutrang
Meunan lam hatee ya masya Allah
Nebri beuteuhah hatee ureung nyan

Syiahkuala bak gobnyan salah
Dum ahlussunnah ka salah jalan
Ulama laen bak gobnya tan pah
Geukheun di meukah hana lageenyan

Sangsang jih sidroe nyang trooh u meukah
Hingga bideu'ah nyang kon lagee nyan
Hana jitupeu kiban sejarah
Baroo sileupah di sideh meunan

Su'ud ngon wahab ka keunong tuah
Jiteumee reupah baidatul aman
Leuhnyan keuh phon that meunan di meukah
Sinan bideu'ah meumacam-macam

Bak kubu nabi hanjeut ziarah
Syirik jipeugah uleh awaknyan
Jejak sahabat ka jipeu musnah
Ahli bait jirhah tanna beukasan

Lon peuseb ohnoe ummi ngon ayah
Ulon ka leupah bak jum'at malam
Ka lon buktikan kiban geupegah
Bacut tan salah tanna meunyimpang

Neudeungoe beutrang kalon beujeulah
Ci neujak sahbah bek salah waham
Beklei neu deungoe teungku majalah
Kitab keuneubah sep keurujukan

Bek panyang pikee pekeran sosah
Ikot mantonglah ulama peutrang
Umu singkat that tobat beubagah
Cok nyang ka jeulah bek sampoe mumang

Kuta Radja, 13 Januari 2014

Wassalam,

CUT LEM MAREUJAN

~~~~