PILPRES

PILEH PRESIDEN (PILPRES)

======================

By: Cut Lem Mareujan

CC:  medyahus@gmail.com   Aceh TV

Salam ‘alaikom lon puphon haba

Bandum pemersa toe deungon jioh

Pengarang ca’e tuha ngon muda

Keu Cek Medya nyang phon ulon boh

Laen nibaknyan hana lon lupa

Keu Nekdin Lhoknga pih ulon bungkoh

Teungku Samuti di Simpang Mesra

Leuhnyan Yah Muda laju ulon proh

Keu Bapak Dahlan sinoe keupala

Irul Pujangga jinoe lon ratoh

Keu Parang Bungkok lon puphon sapa

Ngon Khaidir Buga ulon peu teumboh

Mukhlisin Al-Basharah dan Rafi muda

Amun Qimun na sigoe lon seupoh

Keu Abi Daod di mana saja

Ranub ulon ba jinoe neupajoh

Toktok Beuragoe ateuh bak jeumpa

Si cicem pala sujih that kiroh

Ca’e lon karang dua lhee banja

Meunyoe na cupa bek rioh-rioh

Pileh Presiden dilikeu mata

Pakriban cara meuraba bek roh

Dua boh pasang calon ka nyata

Geupeuget pesta bak buleun tujoh

Perlee tatupeu mandum syedara

Hak tapeuguna bek meukloek leupoh

Pileh Presiden memang hak gata

Warga negara umu nyang katroh

Di dalam facebook kaleuh geurika

Dalam beranda Cek Medya suloh

Jinoe lon kirem bak layeu kaca

Mangat troh haba beuleubeh jioh

Bapak Jokowi calon leumboi sa

Pak Yusuf Kalla keu waki geuboh

Dapat dukungan Parte Buk Mega

Parte Hanura sinan sajan roh

Partai PKB sajan roh bila

Nasdem cit atra Suriya Paloh

Peut boh peureutei gumpoi suara

Peujuang Raja atra gobnyan boh

Bapak Prabowo calon keudua

Hatta  Rajasa waki geubungkoh

Limong boh partei nyang phon Gerindra

Golkar P Tiga dukungan sunggoh

PAN ngon PKS sajan seureuta

Keurija sama keu raja beuteumboh

Geutanyoe rakyat tanging ka nyata

Menoe keuh cara jibagi bungkoh

Dalam politik cit meunoe cara

Phon meusyedara leuhnyan ka musoh

Phon saboh kapai arong samudra

Leuhnyan ka dawa meukreuh-kreuh bohsoh

Takkan abadi teman setia

Cinta mendua kadang seulingkoh

Phon saboh parte sajan geubina

Bagi tan sama punca phon kiroh

Meunan cit hana musoh seulama

Leuh peukreuh jungka ka tanlei kiroh

Ka geumeusahoe geudukong raja

Janji lembaga keu mentri geuboh

Meunoe keuh akai dum elit bangsa

Rakyat jeulata keutumbal geuboh

Antara elit oh kaleuh pesta

Geubagi rata kursi meugaboh

Bukon lei sayang padee lam paya

Reubah meutimpa jikap lei tikoh

Leupah that sayang rakyat jeulata

Dalam derita hana soe uroh

Kaleuh lon tuleh lagee nyoe cara

Putoh syedara geutanyoe bek roh

Pileh presiden eu kriteria

Bidang AGAMA tanyoe bek runtoh

Tapileh calon nyang akhlak mulia

Bek jiduk raja cit bangsa tikoh

Bek jikorupsi harta negara

Jipuwoe laba pangkai nyang jiboh

Mumada ohnoe ca’e lon rika

Meuah syedara ulon golom troh

Malam nyoe ulon u Lubuk kuta

Aneuk lon jakba MTQ jih roh

Meunyoe na umu sihat anggota

Bak Cek Medya ukeu ulon troh

Meuheut cit lon duk bak layeu kaca

Mangat deuh muka troh u meulaboh

Kuta Radja, 23 Mei 2014

Wassalam,

Cut Lem Mareujan