LON LAKEE MEU'AH HARAP LON PINTA

LON LAKEE MEU’AH HARAP LON  PINTA

--------------------------------------------------------

By: Cut Lem Mareujan

Assalamu 'alaikom saleum horeumat
Keu rakan sahbat bandum peungarang

Krew Aceh TV  sajan keurabat

Jaroe lon anggkat bak ulee timang

Bandum pemersa rata jeut teumpat

Nyang teungoh siap deungoe siaran

Na bacut haba keunoe lon intat
Neudeungoe siat bacut lon peutrang

Tan ulon seubut sidroe-droe sahbat

Lon takot teulat leupah that panyang

Jinoe rombongan ka siap-siap

Leh pue na pakat geubri arahan

Meunyoe na umu dari hadharat
Lon neuk beurangkat deungon ma sigam
Rencana kamoe pubuet ‘ibadat
Umrah beurangkat u tanoh haram

Uleh karna nyan ulon meuharap
Pat pat na silap bak lon keumarang
Kadang roh meukloek hate dum sahbat
Haba lon surat kadang kreuh ceukang

Neupeumeu'ah lon bekna meukeumat
Ngon rakan sahbat seureuta tolan
Neulakee do'a nibak hadharat
Kamoe beurangkat beutroh tujuan

Beujeut umrah nyoe nilai 'ibadat
Ulon beusihat bekle lam mumang
Beu lon teumeu com hajarul aswad
Wajeb ngon sunat bek ketinggalan

Seubab dumhoe ka lon jak meu ubat
Jikheun lon sihat tan kelainan
Nyang ulon rasa mumang cukop brat
Sabee ibarat donya meuguncang

Lon harab sideh geu mustajabat
Lon jak bak teumpat kiblat seumayang
Lon roe ie mata jaroe lon angkat
Beugeupeuleunyap penyaket mumang

Bak pintoo ka'bah keunan lon hajat
Ulon munajat bak sidroe Tuhan
Thawaf ngon sa'i rukon penteng that
Beusanggop sahbat ulon kerjakan

Kadang ca'e lon geubaca teulat
Sabtu ka lewat han sempat karang
Lon cuba kontek cek Medya dipat
Gobnyan jioh that di Kuala Simpang

Meunyoe geubaca bak saboh sa'at
Kadang hai sahbat ka lon teureubang
Neu anggap mantong tanyoe meusapat
Ca'e lon intat tadeungoe sajan

Mumada ohnoe nyang ulon harap
Memang katrep that tan lon keumarang
Lam persiapan lon jak u 'Arab
Makajih sahbat tan kesempatan

Lon lakee do'a nibak hadharat
Disinoe teutap tanyoe keumarang
Meunyoe na umu oh troh u teumpat
Haba ta sambat dakwah ta peutrang

Aneuk beurujuk ateuh bak coklat
Dicong bak langsat ka jiduek musang
Keu Cek Medya saleum that hangat
Jaroe lon angkat mandum peungarang

Medan. 15 Desember 2014

Wassalam.

Cut Lem Mareujan