HANA MEUJUDUL

HANYA SIKADA PEUPUEH MEUCHEN

(HANA MEUJUDUL)

-----------------------------------------------

BY:  CUT LEM MAREUJAN

Assalamu alaikom kawom syedara

Sajan seureuta ngon rakan sahbat

Katrep that lawi rawi tan lon ba

Bak layeu kaca hana lon intat

Keu Bapak Dahlan sajan Cek Medya

Keu Ceh Min Cakra pih lon meuchen that

Keu Ceh Sofyan saleum lon laya

Troh Bak Yah Muda seureuta Cut Hap

Teungku Samuti di Simpang Mesra

Cek Dun Baroena jioh leupah that

Di Septyawan peungarang muda

Nek Din di Lhoknga adoe si urat

Syeh Nanggroe Merdu di Pidie Jaya

Dengon MAA lon kalon dumpat

Sidroe  treuk adoe banwoe Malaya

Irul Pujangga kana di teumpat

Samhas di Tibang tumpang salama

Di Lamreung pihna dara carong that

Nurul Hasanah gerasi nama

Geupeuget rika haba peu ingat

Katrep tan deuh hi di Abi Zalfa

Muldani Muda rika that mangat

Keu rakan laen lon salen teuma

Lon sisep nama di dalam radat

Ulon tet jumpung dalam blang raya

Lon keuneuk pula capli ngon tomat

“HANA MEUJUDUL” malamnyoe rika

Peupuleh hawa keunoe lon intat

Lon peupueh meuchen baten lam dada

Lon seubut nama tanda lon ingat

Teuma lawet nyoe hanjeut lon teuka

Adak pih hawa saja lon seungap

Lon nging peukateun jangeun lam rika

Meumacam gaya peungarang intat

Kadang geupasoe budoe bahasa

Keu aneuk muda beuna manfaat

Ladum geukisah masalah lama

Budaya luwa bek rooh ji peurab

Na sit geusinut but penguasa

Keuritik pihna keu waki rakyat

Di Abi Dawod pih saboh cara

Ca’e geurika bahasa “leklap”

Meujan geuculok Indonesia

Ujong geuputa ngon Aceh meuhat

Subeuki Patek lisek lom cara

Haba geurika langsong geu intat

Geuduek geunireng sampeng Cek Medya

Tertip Acara digobnyan nyang mat

Teungku Samuti ka meuri cara

Hana geukira dumsoe geutakat

Geu apiet awe sabe lam rika

Soe nyang meurasa bahkeuh meujungkat

Jameun ka akhe jahee leupahna

Sabee lam rika geubri nasehat

Haba peu ingat keu kawom muda

Bek salah raba aleran sesat

Meujan na cagok harok lon raya

Peulom Yah Muda lawan ngon Cut Hap

Na peu bak takhem jipoe ie mata

Teungku Din citna tukang peu asap

Ulon boh contoe malam baroe sa

Bah nama desa geuyu peuleungkap

Di Septyawan ureung phon puga

Ngon ureung tuha meutakat-takat

Dibak malamnyoe sang jeut prang raya

Sa lawan dua nibak alamat

Peu Septyawan siap teunaga

Neu balah rika Yah Muda, Cut Hap?

Katrep gohlom nyan pih na jeut dawa

Nek Din Di Lhoknga geu buka kitap

Bah poligami inti ceurita

Nyan saboh gura watee ta ingat

Tapi neumaklum wahee pemersa

Dak geumeudawa jep kupi sapat

Keumangat rukok geupupok haba

Latihan sastra cit ka sipakat

Sira meulatih buhu lam rika

Asoe pih beuna jeut keumanfaat

Maka geutanyoe bek salah sangka

Pakon Cek Medya ureueng geupeukap

Saleum meuturi bak lon nyang hina

Pengarang dumna nyang deungoe radat

Hana lon seubut si B ngon si A

Lon takot rika entreuk panyang that

Nyang ulon seubut di dalam rika

Nyang na lam kaca kireman surat

Seubab ca’e nyoe sideh geubaca

Meunyoe lam maya han jeut neu tatap

Nyang tan lon tuleh kon keuh lon lupa

Neukalon hana watee geu ucap

Watee geu hayoon lei Cek Medya

Meunyoe tan gata teuntee rugoe that

Capli ka timoh nyang ulon pula

Jeut ba u banda sajan boh tomat

Mumada ohnoe ca’e lon rika

Pat-pat na cupa peumeu’ah leugat

Kuta Radja, 04 Mei 2015

Wassalam,

Cut Lem Mareujan