PRANG LAM CA'E

PRANG LAM CA’E

----------------------

By :  Cut Lem Mareujan

Assalamu alaikom keu bandum rakan

Inong ngon agam jioh deungon thoe

Minggu nyang kaleuh hanjeut long datang

Ulee that mumang leupah that paloe

Tapi bah meunan tan mangat badan

Leupah that simban ca’e lon deungoe

Lon nging Yah Muda get that geurangsang

Ngon Cut Hap sajan sangsang jeut meuloe

Balah meubalah lagee tanging prang

Ngon parang panyang meutaktak asoe

Geukheun na dapu dua boh gobnyan

Meunan geu layang lei Nekdin Lamnoe

Leuh nyan geubalah hana urosan

Dak dua pasang hana tom kachoe

Peunteng beu adei carong peutimang

Hana tom jeut prang ka lhee ploh cucoe

Teuma keu Nekdin geupoh sampengan

Pakon jeut meunan gohlom na cucoe

Sampoe an jinoe gohna jawaban

Kadang hai rakan jaweub malamnyoe

Geukeun Yah Muda hanjeut keumarang

Bak Ceh Sofiyan geuyu meurunoe

Leuhnyan geubalah leupah that timang

Cut Hap oh leuh nyan keunong seumanoe

Ca’e Yah Muda kaleuh geulayang

Cut Hap lei rijang ka geupeurunoe

Geupeugah Cut Hab hanjeut keumarang

Geukirem Salam phon sampoe dudoe

Meunoe keuh ta eu ureung nyoe muprang

Dalam karangan meugiloe-giloe

Ureung nyang deungoe meunyoe tan paham

Geumee laporan bak Jamboo Rondoe

Geupeugah sideh jinoe kajeut prang

Teungoh ji tayang bak TV jinoe

Pakon jipeuduk meunoe piasan

Abeh seuniman ka jipeu meuloe

Bacut lon peugah tadeungoe beutrang

Lam ca’e meuprang nyan cit atra droe

Han troh bak hatee bandum ureung nyan

Hanya hiburan latihan rampoe

Meuhan neupateh lagee nyoe macam

Cuba hai rakan neukalon keudroe

Watee geujak jok keunoe karangan

Gobnyan sijalan meumat-mat jaroe

Duk saboh honda teuka meusajan

Teuma oh leuhnyan sigoe lom geuwoe

Dum nan keuh indah seni karangan

Han jiduk dendam sosoe nyang deungoe

Latih emosi sinoe sit rakan

Kadang that simban keunong bak gigoe

Han jeut geubalah deungon sembarang

Teutap aturan pakhok beu meuhoe

Seubab ka meunoe phon jameun monyang

Muprang lagee nyan sampoe an jinoe

Hana peu hireun pakon lagee nyan

Memang ka meunan seni meurampoe

Di ulon tuan watee malam nyan

Di dalam kawan ‘ik rab jipeupoe

Watee meudawa lhee droe ureungnyan

Urat prut meujan ka meuku keudroe

Han ek lon peutheun lon khem that simban

Teungoh lon mumang sang lon katuwoe

Dumnan keuh gura ca’e geukarang

Troh jula malam lon adee gigoe

Peukeuh minggu nyoe na lom lagenyan

Di ulon tuan ka siap keudroe

Seuteungoh siploh hanlee lon jalan

Teutap meusimpan han lon jak sahoe

Bak ujong rika cok keusempatan

Lon sapa rakan meudua lhee droe

Nyang fon lon tuju keu Bapak Dahlan

Krew TV sajan nyang gohlom geuwoe

Keu Cek Medya saleum lon hidang

Aleh pih pajan jeut lon jak keunoe

Teungku Samuti hoka digobnyan

Atra geukarang rihon neuk deungoe

Keudeh u Cunda neupeutroh peusan

Jinoe lontuan meutamah adoe

Akhbar Al-Mutawassila nama gigobnyan

Meunyoe keumarang lon angkat jaroe

Keu Ayah Muda ngon Cut Hab sajan

Sigoe lon paban ngon Nekdin Lamnoe

Keu Abi Dawod bah tan balasan

Lon kirem Salam ngon Raffi sigoe

Keu Khaidir Buga ulon peusaban

Mukhlisin leuhnyan pih hana tuwoe

Assalamu alaikom keu bandum rakan

Meu’ah hai taulan kadang na kachoe

Dak tuha umu kadeuh ngon uban

Peunutoh lon tan bideung meurampoe

Haba meupakhok galak lon tuan

Meunyoe tan timang lon neupeurunoe

Kuta Radja, 28 Agustus 2014-08-28

Wassalam,

CUT LEM MAREUJAN