NASIB RAKAN DI MALAYA

NASIB RAKAN DI MALAYA

By: Cut Lem Mareujan

Assalamu alaikom warahmatullah

Saleum ukhuah keu rakan seuni

Keu handai tolan ummi ngon ayah

Wareh ngon sahbah pemersa TV

Haba lon karang meugrit sileupah

Sang hana langkah lon intat rawi

Saweub lawetnyoe hanjeut lon langkah

Bacut masalah dang lon tangani

Tapi bandum nyan keuhendak  Allah

Akhee jih leupah keunoe sit rawi

Hana lon saja beurita leumah

Nasib di sahbah di luwa nanggri

Ramee that rakan ka jibeureukah

Gamba geu unggah jaroe meugari

Ie mata lon roe hanjeut lon peugah

Hatee meudarah lagee teusiesie

Pakon jeut meunoe e poeta Allah

Leupah that sosah aneuk nanggari

Arong Samudra laot bahrollah

Mita nafakah sambong hayati

Jak u Malaya nanggroe geukeubah

Seubab that sosah nafkah lam negri

Geutinggai aneuk poma ngon ayah

Geujak tueng upah mita raseuki

Bak rumoh tangga geujak seumeurah

Geusampoh labah ngon jaga bayi

Dalam uroe kha keunong parentah

Ngon reu-oh reu-ah sibagoe kuli

Bak mita ringget phet that sileupah

Meujanjan upah ka keunong taki

Keu bansa tanyoe Indon jipeugah

Hana maruwah meu saboh tali

Kadang dang mangat meutulak kisah

“Pelipur lelah” ngon rakan Fbi

Keunong  razia Polis lam dinaih

Ringget jireupah hasee meukuli

Pendatang haram  laju jipeugah

Ka jibeureukah  jaroe ngon gaki

Siape  suroh sini melangkah

Sikap jih leumah tan manusiawi

Munir Sumatra conto lon peugah

Lon lakee meuah hai bungong giri

Gata lon seubot bek jeut masalah

Bekna nyang peugah ulon teumaki

Irul Pujangga pih ka peureunah

Kayem meuramah lon nging lam Fbi

Kiban lon peuget adoe meutuah

Hanjeut lon peugah jantong kudangdi

Hanya keuh do’a bak poeta Allah

Beubagah keuh glah ujian geubri

Gata hai adoe hatee beutabah

Ta ingat Allah malam ngon hari

Nanggroe Aceh nyoe seuramoe meukah

Hasee meulimpah tunong ngon pasi

Dum hasee tambang sinoe geukeubah

Minyeuk deungon gaih karonya rabbi

Tanoh jih subur lahan pih luwah

Bumoe jih indah darat bahari

Dum wisatawan keunoe jilangkah

Tijoeh ie babah lam hatee iri

Wahee e Bapak lam Pemerintah

Bek raya peugah ngon wet-wet gaki

Lapangan kerja sinoe neupeuhah

Bek gadoeh marwah tanyoe gob caci

Bek ban ka troe prut dron tan lei sosah

Ka teutop babah  dum teungku waki

Watee goh tasook dasi deungon jaih

Bak rakyat sosah tapubloe janji

Beuna ta ingat dosa ngon Allah

Seubab hana sah neupajoh gaji

Rakyat lam nanggroe hudep lam sosah

Nanggroe geukeubah jak luwa negri

Marwah Negara deungon Daerah

Indon jipeugah biek bansa kuli

Padahai nanggroe kaya sileupah

Tapi sep susah mita raseuki

Meunyoe urosan reupah-meureupah

Lemboi Wahidah hanjeut Isnaini

Peulom meureubot jabatan basah

Koropsi meugah ban sigom bumi

Gajah meunari lam glei seulawah

Meurak that ceudah di Sulawesi

Meumada ohnoe haba lon peugah

Meunyoe na salah meu’ah beuneubri

Rakan lam maya lakee bak Allah

Keu rakan sahbah di Luwa Nanggri

Bagah seuleusoe dalam musibah

Dak jeut beubagah keunoe geu ili

Kuta Radja, 26 September 2014

Wassalam,

Cut Lem Mareujan

Teutumpang Saleum kepada:

1. Pak Dahlan

2. Cek Medya Hus

3. Tgk. Samuti

4. Yah Muda

5. Nekdin Lhoknga

6. Cek Dun Barona

7. Khaidir Buga

8. Cut Hab

9. Abi Dawod

10. Khaidir Buga

11. Mukhlisin Al-Basharah

12. Aneuk Bayi

Dan rakan2 pengarang nyang laen, teristimewa ke bandum pemersa Aceh TV khusus jih penggemar CA’E  BAK JAMBOO.