PEUNYAKÉT HATÉE

PEUNYAKÉT HATÉE
------------------------
By:  Cut Lem Mareujan

Assalamu ‘alaikum warahmatullah
Jaröe dua blah lôn bôt that lambông
Keu rakan sahbat dumpat neusinggah
Saleum ukhuah waréh ngön kawôm

Nyang pertama phôn sanjông Pöetallah
Taufiq hidayah keutanyöe jitrôn
Seulaweut saleum keu Rasullullah
Ahli ngön sahbah takirém langsông

Saleum that mamèh lilèh lôn ruah
Keu rakan madah pujangga ulông
Peungarang ca’e lôn lakèe meu’ah
Katrép sileupah hana lôn gabông

Bacut lôn sibôk dawook ngön dinah
Luwa daerah meujan lôn arong
Barôo kalinyöe keunöe lom leumah
Bukon hai sahbah ka lôn boh jurông

Dalam rasia buhu lôn ubah
Söe nyang na leumah tanda ka mufôm
Ureueng nyang baca bisa geusurah
Dipat meu ubah buhu ka sirông

Lontöng ngön lutông ujông meu ubah
Neutulông peugah dang-dang ta sambông
Lôn nging na dawa bak rakan sahbah
Supaya jeulah kaidah pantôn

Nyoe meu ubah bacut beh....
Sambil menyelam minum air.

Penyakét hatée  bahlée lôn peugah
Adak jeut sahbah tanyöe bèk keunöng
Nyang ulôn deungöe meunöe geupeugah
Nibak jeumelah ka meuhat limöng

Nyang pertama phôn lôn ci peuleumah
Nan jih ka jeulah peunyaket SOMBÖNG
Peunyakét qalbi beunci that Allah
Peujiôh bagah agam ngön inöng

Iri ngön deungki HASAD istilah
Meunöe pih ulah tanyöe bék keunöng
Ta eu gob seunang geutanyöe susah
'Oh gob musibah seunang takalon

Nyang keu lhée RIYA suka peuleumah
Mangat gob peugah hayeu ngön caröng
Mita sanjôngan gobnyan ibadah
Sabée mita gah rata jeut loröng

Keupeut Kriet Juit PELIT meugeutah
Ek linot leupah ceuleuki bangön
Han geutem sagai suai seudeukah
Alasan peugah dompet kèe kosöng

Teuma keuneuleuh kaleuh geusurah
UJÔB bak ulah bangga dröe caröng
Hingga tan syukur keu nikmat Allah
Sang jirih payah cit buet jih mantöng

Limöng peunyaket ta lét beupantah
Bagah ta pinah bèk lée trép jidöng
Murka ilahi beunci Hadharah
Jiôh hidayah berkah han jidöng

Meunyöe ka jiduek ta jutuek ta shrah
Mental ta ubah ulèe bèk bingöng
Ilmèe ta tuntut jak beut beubagah
Qur’an ngön Sunnah ta mat beuköng-köng

Leuh nyan hindari pakri bèk parah
Sadar beupantah salah baröekon
Bèk ta peuturôt larôt lam salah
Teukat ta ubah bèk meugisa lom

Nyoe ka jiwoe lom atra phôn beh....

Siplôh peunuleh sinöe lôn unggah
Sajan ta olah sama tapeuphôm
Seubab lôn keudröe kutöe sileupah
Peunyaket Qalbah pih ka meunahôn

Nyang pertama phon qur’an bacalah
Makna teusurah ta cuba peuphôm
Leuh nyan rasakan tinggi zat Allah
Gobnyan keuh sahbah khalliq nyang Agông

Keulhèe ta mita ulama bagah
Ta tanyöng beupah pat nyang han mufôm
Keupeut ta seubut beule zdikrullah
Bandum lathifah trôh ubôn-ubôn

Keulimöng peulèe amai shalihah
Sunggôh ibadah keunam lôn susôn
Keutujoh Maté ingat tiep sa’ah
Lapan akhirah ingat geupeutrôn

Leuhnyan sikureung peukureung bagah
Donya bèk leupah geutanyöe gandrông
Siplôh meudo’a pada hadharah
Lakèe beuceudah iman lam jantông

Alim 'ulama ka geupeujeulah
Peunyakét parah jiduk bak qalbôn
Peujiôh dosa maksiet ta ceugah
Nyan keuh neurajah wahei rakan lôn

Mumada ohnöe rampöe lam madah
Ta ingat sahbah bèk rôh lam jurông
Meu’ah lôn pinta patna nyang salah
Dipan hana pah neupeugah bak lôn

Mudah-mudahan ka geutém peugah
Cara ta gubah ca’e ta susôn
Sira meurunöe rampöe ta peupah
Taci ba dakwah peu ingat kawôm

Kutaradja, 05-12-2015
Wassalam,

Cut Lem Mareujan