QU ANFUSAKUM WA AHLIKUM NAARA

QU ANFUSAKUM WA AHLIKUM NAARA

-------------------------------------------------------

By: Cut Lem Mareujan

Assalamu alaikom lon mubri saleum

Keu rakan bandum tunong ngon pasi

Peungarang ca’e sare lon sunyung

Sajan lon surung crew Aceh TV

Keu Cek Medya hana tom kureung

Han lon peulinteung Tgk. Din tari

Keu Ceh Min Cakra sajan lon bulung

Ceh Sofyan Leupung saleum lon bagi

Cut Hab Montasik mantik that ureung

Ka lon meuteumeung watee kauri

Keu Ayah Muda lon tamah jangeun

Ca’e geu apeung lagak han sakri

Teungku Samuti Guree ulon kheun

Trep tan meudiyeung karya seuni

Peukeuh lawetnyoe rapat tiep-tiep jeum

Bah kurikulum siswa ngon siswi

Cek Dun Baroena adoe ulon kheun

Bah jioh mideun ulon geurawi

Keu Nek Din Lhoknga Hana peu hireun

Hana jeut lon kheun weub payah sandi

That istimewa keu gobnyan lon leung

Keu adoe buleun  Nek Din Di Pasi

Nyan asoe kama citka geuteumeung

Bak Amun Qimum lon teumeung gunci

Seumoga hudep sabee lam rukun

Jinoe neubangun saboh mahligi

Kadang malamnyoe TV hana yum

Kamoe ka maklum katrep that leupi

Tajak u patek culek u pateun
Tawoe u Bireuen kakeun boh giri
Mumada dilee lon kirem saleum
tujoh uroe leung tamah keulayi

Jinoe lon peugah saboh peukateun

Di dalam mideun beurita that gli

Suai aqidah meutamah kengkeung

Meunyoe meuteumeng ci neupeurati

Ulah si kaphe reule ban mandum
Bintang ngon buleun jineuk keubiri
Dolar jihamboo motto ji kheun-kheun
Bantuan bangun bala tsunami

Si mirah puteh jayeh than tuleung
Meunan bak lageum tan dihargai
Miseu lon peugah saboh peukateun
Peunyang jisuleung di ungki-ungki

Hukom geutanyoe beujeut tembayeung
Weub sidroe ureueng warga Australi
Peu nyangka jibri ji ungket bàndum
Mangat tamaklum peunyang ka jibri

Hukoman mate bekle na ruweung
Bahpih tateumeung bandar ekstasi
Meunan jiharab jigarap bandum
Jimita dukung tanyoe dicaci

Upaya laen le that ka teuleung
Sigala bideung jibangun missi
Pinah aqidah keumah jisuleung
Keu bintang buleun beu kristiani

Dalam beurita han ek lon bileung
Ramee that ureung murtad keu rabbi
Meubagoe cara sigala bideung
Ngon peng jisuleung jabatan jibri

Dipura-pura syahadat jikheun
Hingga jirayung aneuk neugeri
Dara geutanyoe keubinoe jitueng
Leuhnyan jibaplung u luwa negri

Nyang muda-muda hana peu hireun
Get that jisanjung jeut keusuami
Nyang manyak-manyak keu aneuk jikheun
Hatee yah jitueng jeut mangat geubri

Oh troh nanggroe jih ka laen tunyum
Nyan bintang bulen jikeun tan get hi
Ka meukaleung thon tanyoe lam neu um
Tan lei ta tunyum bala tsunami

Ta keuneuk bantah atra nyang jih keun
Payah tapeuteun suami istri
Cinta ka timoh peunoh ngon kagum
Hingga peujikeun payah ikuti

Meunan lon baca lam saboh mideun
Data lon suleung jeut neuteuliti
Beutoi ngon salah bek jeut keu hireun
Manfaat tatueng jeut hati-hati

Qu anfusakum tuhan ka geukheun
Leuhnyan ahlikum geuyu naungi
Dari apui hu bek roh teugageung
Makajih bandum beutapeuduli

Tapi nyang paloe padup droe ureung

Habanyoe jikheun hana bukeuti

Tapi geutanyoe bek laloe teuheung

Beurita tatueng jeut jaga diri

Ohnoe mumada haba lon suleung
Keu rakan bandum tunong ngon pasi
Leubeh get ceugah bek dudoe raheung
Maka jih lon leung antisipasi

Kuta Radja, 27 Februari 2015

Wassalam,

Cut Lem Mareujan