HIKMAH COBAAN
By: Cut Lem Mareujan
Salam ‘alaikom kawom ngon taulan
Inong ngon agam tuha ngon muda
Kru Aceh TV luwa ngon dalam
Bandum peungarang sajan pemersa
Ca’e malamnyoe sinoe lon hidang
Hai peungalaman nyang ulon rasa
Kadang jeut tacok bahan reunungan
Hikmah Cobaan lon cuba rika
Lon lakee meu’ah bak mandum rakan
Bukon keluhan curhat bak gata
Haba kalinyoe teulat lon karang
Tan mangat badan lhee uroe nyangka
Kadang bak foto kaleuh neupandang
Profil lon beuntang lam alam maya
Lon takot salah dalam dugaan
Seubab lon pasang foto yoh muda
Kadang that lucu rakan lontuan
Amithabachan keulon geusapa
Goh geu eu langsong wajah lontuan
Geukheun Shahrukhan lei Nekdin Lhoknga
Ban watee geu eu ka laen macam
Teukeujot badan Nekdin baroesa
Geukeun lam hatee hana geupeutrang
Cut Lem Mareujan kon lagee gamba
Maka jih jinoe wajeb lon peutrang
Bek salah faham ngon foto lama
Siploh thon nyangka teukeudi tuhan
Cut Lem Mareujan cobaan teuka
Keunong peunyaket ulee lon mumang
Seu akan-akan sabei lam geumpa
Ulon boh miseu dalam ukuran
Tujoh koma nam goyang lon rasa
Watee phon saket meulilet badan
Umu lhee lapan lon mantong muda
Tamong thon siploh jinoe berjalan
Saket lon tuan gohlom na reuda
Lonjak meu ubat ka bansaboh nyan
U nanggroe jiran ka lhee goe gisa
Kuala Lumpur meunan sit Penang
Lon poe u Thailand troh Singapura
Ubat lam nanggroe meubagoe macam
Banda ngon Medan sampoe u Jawa
Jantong ngon ulee kaleuh jireukam
Darah kotoran ka jipareksa
Hana masalah normal ukuran
Jikeun lon tuan sihat anggota
Tapi lon rasa hana lagee nyan
Tiep uroe tuhan sabee lam geumpa
Watee ulon jak rasa meuguncang
Sang-sang geulayang lam badee raya
Payah ba keunet hoe nyang lon hadang
Meunyoe han meunan teutap lam tika
Nibak keureuja ka meunan-meunan
Asai deuh ruman sabee lon teuka
Meujan ka tinggai dalam ruangan
Dang preh jemputan bak keluarga
Ulon meulake uroe ngon malam
Mudah-mudahan lontuan saba
Loncok hikeumah dalam cobaan
Peutoe ngon tuhan tobat nasuha
Menyoe kon menoe geubri cobaan
Kadang lon tuan gadoh ngon dosa
Silaturrahmi tan kesempatan
Peulom hai tolan lon tuleh sastra
Watee lon teuga nibak saboh jan
Poh dua malam baroo lon gisa
Ulon keureuja uroe ngon malam
Masa hadapan le cita-cita
Gareih teukeudi geubri lei Tuhan
Meunoe suratan lontuan ridha
Meunyoe kon meunoe gareih suratan
Panee lon tuan turi Yahmuda
Hana lonturi keu Ceh Sofiyan
Peulom hai rakan keu Ceh Min Cakra
Ngon Cek Medya hana hubongan
Meunyoe kon meunan saket lon rasa
Teungku Samuti pih saboh macam
Dak lon deungoe nan lon tusoe hana
Tapi jinoenyoe hatee lon seunang
Le that pengarang jeut keu syedara
Hikmah lam saket nyang lon rasakan
Khatam Al-Qur’an kon sigoe dua
Meunan sit aneuk dalam didikan
Afai Quru’an lon teumeung aja
Haba lon peugah bukon pameran
Hikmah cobaan bandum na rasa
Bekna brok sangka tanyoe ngon tuhan
Kisah lontuan lon boh umpama
Meumada ohnoe lon koh karangan
Ka lhee halaman hana lon sangka
Bacut lon brithee bak bandum rakan
Rumoh lon tuan pinto lon buka
Ulon meuharap bak handai tolan
Keu ulon tuan neuthem meudo’a
Beubagah puleh lam kesaketan
Dalam cobaan bek putoh asa
Pajan na watee ngon kesempatan
Leumboi lon tuan na bak Cek Medya
Kadang na neujak sagoe Keutapang
Bak Cut Lem Marjan piyoh syedara
Sayang boh lada luroh bak karang
Tangkei ka leukang angen peudoda
Meunyoe na umu Tuhan bri panyang
Meuheut lon datang bak layeu kaca
Kuta Radja, 16 Mei 2014
Wassalam,
Cut Lem Mareujan
Tidak ada komentar:
Posting Komentar