FENOMENA DEBAT NGON UPAT

FENOMENA DEBAT NGON UPAT
(SANG DRÖE CARONG THAT)
¤¤¤¤¤¤¤¤¤¤¤¤¤¤¤¤¤¤¤¤

Salam 'alaikôm kawôm syedara
Tuha ngön muda saleum lôn intat
Pujöe ngön syukôr akan Rabbana
Seulaweut taba akan Muhammad

Dum sekalian sahbat baginda
Ahlul bait seurta tanyöe alamat
Alim ulama waréh anbiya
Dari phôn mula sampoe kiamat

Meu'ah awai phôn bak gurée rika
Kadang bahasa ulôn tan teupat
Makeusud hatée na bubée raya
Watèe lon rika kadang han mupat

Jinöe takalon lam fenomena
Ureueng meudawa rata jeut teumpat
Nyang glie takalon ileumèe hana
Sang-sang ulama watèe meudeubat

Jipeugah miseu dalil jih hana
Ka hèk jibaca hana teusurat
Pakon jipubut nyang hana-hana
Meunan jidawa meuteu oh hebat

Watèe ta kaji bak asai mula
Nyang peudöng dawa awai sit bansat
Watèe umu jih jinöe ka tuha
Gurèe jimita dipat nyang mangat

Miseu internet seumpat jibuka
Jicuba baca leuhnyan jiseurap
Dak salah puphom hana jikira
Akai leumboi sa jicok keu alat

Watèe sikula ulon rangking sa
Trôh an sarjana IP get that-that
Keupeu lom teuma jak bak 'ulama
Tafsir dum kana le that jimeukat

Rata terjemah leumah deuh nyata
Kolot leupahna awak beut kitab
Keu kitab kuneng laju jihina
Pakon wareuna sabei nyan teutap

Meunan keuh jikeun watèe meudawa
Jinöe ta gisa bèk kolot that-that
Ulama awai sang seusat dumna
Bandum nyang beuna lagèe di Arab

Lôn deungöe keudröe bak saboh masa
Dua sarjana teungoh meu upat
Ulama jameun jikheu dum riya
Geular bak nama leupah that jungkat

Mantöng lon simak lon sampöng hana
Walaupun dada lon ka meu tat-tat
Sampöe jibahas bah keun sayyidina
Peurintah hana keupeu ta ucap

Saboh aliran ureueng nyan dua
Lawan goh teuka maka seunang that
Jikheun nyöe salah di Arabia
Haji bèk lei na keudéh ta peurab

Leuh peuleuh saboh khém lée meubura
U Meusir teuma jiyu meukiblat
Oh ban lon deungoe ka meunan cara
Lon seu ot sigra hai neu meu ucap

Bek leupah-leupah rakan meuhaba
Gata sarjana kon bideung kitab
Barôo bak google neubeut bandua
Bée na ulama ka neu kheun sisat

Watèe jameun kon pakon nyöe hana
Aceh nyoe jaya jithee barang pat
Tapi bak akhei suwei jiputa
Wab le leupahna aleran sisat

Pemimpin nanggröe lalöe ngön donya
Bideung agama kureueng geu ingat
Globalisasi sarengan hana
Trôh dari luwa hana söe hambat

Bunöe neupeugah sit uleh gata
Arab nyang beuna wab keudéh qiblat
Ka'bah geupeuget suroh Rabbana
Bukon nyan harta penduduk 'Arab

Ateuh peurintah Allah Ta'ala
Muslim lam donya keunan ta hadap
Bukon kareuna hormat keu bangsa
Geutanyoe sama ngon ureueng 'Arab

Meunan sit bideung hajjal bayyita
Suroh Rabbana keunan sit teumpat
Meunyöe gobnyan yu u nanggröe china
Ummat lam donya hana jeut ralat

Miseu Meukah nyan laen nyang raja
Taboh umpama jiprang lei Barat
Qiblat ngon Haji taminah hana
Kon payah mita höe RAJA ARAB

Maka jih jinöe bek raya haba
Tiep uröe gata sabée meu upat
Dalam seumayang peu nyang neubaca
Fatihah saja cuba neusurat

Meunyoe hana jeut bek lei kreuh jungka
Ngön aneuk china talôo meudeubat
Jih peu nyang jikheun dalam geureja
Jeut tuleh baca irama mantap

Meunöe keuh contöe hai rakan syahra
Deuh fenomena rab rata teumpat
Geupeudöng dawa 'ileumèe hana
Tatakôt bala dari Hadharat

Tajak meununtut akhérat donya
Bèk akai saja nyang na ta jungkat
Han sép ngön akai bideung agama
Maka ulama kaj eut ta peurap

Peulom ta caci warèh anbiya
Akan ta rasa Tuhan bri laknat
Seubab nyang reuloh Islam lam donya
Warisatul anbiya jitém jak upat

Mumada ohnöe ca'e lon rika
Meunyöe na cupa meu'ah e sahbat
Deungön hatée gleih putéh lam dada
Meukeusud rika saléng peu ingat

Tapi neumaklum lôn manusia
Silap nyan sit na sifeut bak umat
Billahi taufiq bak akhee kata
Ngön wassalama ulôn peutamat

Kuta Radja, 12.09.15
Wassalam,
Cut Lem Mareujan