CA'E 50 THON U ATEUH

CA’E 50 THÔN U ATEUH

BY: CUT LEM MAREUJAN

Assalamu alaikom kawom keurabat

Seureuta sahbat sigoë lôn ruah

Bandum pemersa rata jeut teumpat

Saleum horeumat ngön haté teuhah

Keu Bapak Dahlan saleum lambông that

Cek Medya meuhat nyang baca naskah

Keu Ceh Sofyan han tuwëe lôn lhat

Ceh Min ka sihat alhamdulillah

Keu Ayah Muda Lambarô teumpat

Saböh aleuhat geubri hadiah

Haluwa Nagan keubit that mangat

Kaleuh geu intat mamèh sileupah

Teungku Samuti keuneuk beurangkat

Da’a raya that beutrôh u Meukah

Haji nyang mabrur keu gobnyan meuhat

Meunan ta harap bak Poëta Allah

Nek Din Di Lhoknga baklôn tan mupat

Seubab jareueng that han töm lei leumah

Saleum ulôn bri meusangkot leh pat

Sampoë ohnoë hat seugan lôn tamah

Keu Septyawan sajan ngön Cut Hap

Sigoë lôn ucap hana lôn pisah

Gantoë lôn panggé ca’e neu intat

Ta adue balap lageè ka leupah

Teuma Teungku Din kiban na sihat ?

Jeut neuduek sapat neusambat surah

Meukue urat pruet teukhém raya that

Dumpeu neutakat lôn khem meu hah hah .....

Peungarang laén meuchén lôn tat-tat

Hanjeut lôn surat panyang naseukah

Han mungkén ulôn, lôn rôn panyang that

Ka hana mangat geuprèh trép leupah

Cicém keudidi jilumpat-lumpat
Jipeulét ulat talum lam babah
Ca’e kalinyoë jinoë lôn intat
Bah pih ka teulat sigoë-goë leumah

Ulôn bôh judul Limöng plôh liwat

Bukön lôn hajat leupah that panaih

Nyoë tujôh blah thôn judul ulôn lhat

Takôt teu ingat yôh GEUDONG GAJAH

Umu limöng plôh trôh sikhan abad
Lôn cuba surat sahbat meutuah
Beujeut keuh tatueng haba peu ingat
Kadang göh trôh hat jeut sit takeubah

Lôn cuba rika haba nasihat
Mudah ta ingat nibak jeumeulah
Manfaat keudroë dudoë keu sahbat
Hana panyang that cuma dua blah

Teuma nyang keu phon abôn ta ingat
Sunggôh ibadat tapujoë Allah
Ta anggap mantöng singöh tan seumpat
Kadang lam jeurat keudéh geukeubah

Leuh nyan keudua bèk léi takarat
Mita hareukat tumpôk boyyinah
Tema nyang keulheè tacök hikeumat
Ta rasa nikmat bèk kriet sileupah

Tameu'en-meu'en hoë na tahajat
Yôh mantöng kuat han suwah papah
Tajak takunjông teumpat 'ibadat
Tatueng manfaat "pelipur lelah"

Keupeut meunyoë na cucoë meusapat
Meu'en beumangat  cucoë metuah
Kön baby sitter tugaih tanyoë mat
Kön sit seutrèng that ban satpam dinaih

Limöng teurimöng deungön ikhlah that
Tubôh han kuat hana léi gagah
Nyan hai biasa han jeut peu ubat
Tuha hana pat mita neurajah

Keunam nikmati kondisi nyoë hat
Bek jak hareukat meuliwat leupah
Tujôh nikmati pasangan deukat
Kön karna pangkat kaya ngön meugah

Lapan peumeu'ah soë-soë na silap
Dosa barang pat talakeè meu'ah
Bèk keuh na beunci deundam keusumat
Bathén teuntram that ngön insya Allah

Sikureung mita rakan sahabat
Maté bèk that brat geutanyoë gundah
Siplôh useuha haté dameè that
Sigoë-goë takat CANDA ngön sahbah

(Contoë tameukra ngön rakan lam batas2 wajar)

Bèk bingkèng tuloë dumhoë taliwat
Beungèh tan seubab béi ôk masalah
Siblah ta syukur akan keu nikmat
Dak beurangkapat dumhoë talangkah

Tema keuneuleuh rawi ka tamat
Jinoë lôn sambat leumbôi dua blah
Lakeè lindóng droë nibak hadharat
Do'a ta panjat bak Poë Ta Allah

Nyoë nyang na baklôn tanglông hikeumat
Kadang bak sahbat na nyang hana paih
Tulông peubeutôi sangsôi beuteupat
Hingga manfaat tatueng barakah

Na padup sumber ulôn peusapat

Kadang na sahbat nyang bri seunamah

Keuritik saran lôntuan harap

Pat nyang lôn silap neutulông peugah

Kuta Radja, 21.08.15

Wassalam,

Cut Lem Mareujan