TENTANG RIHON

SEU’OT SAMBOT LHEE DROE PUJANGGA

TENTANG “RIHON”

--------------------------

(Sudah Dibacakan Di Aceh TV pada Sabtu Malam, 09 Agustus 2014)

1.     CUT LEM MAREUJAN

2.     TGK. SAMUTI

3.     IRUL PUJANGGA

CUT LEM MAREUJAN

----------------------------

Angen pih jipot meu alon-alon
Hatee lon rihon seusak lam dada
Rindu teubayang meulabang jantong
Teuingat gampong jioh dimata

Sue ie dalam blang ngon 'at 'it leusong
Boh mamplam gadong lincah boh ara
Keubeu meukubang rangkang bubong on
Watee lon rihon sang deuh dimata

Ubi teupeungat jeuleupak teupong
Palet ija krong golong beulaya
Pineung ngon gambee balot rukok on
Sang ka meuploh thon lon pandang hana

Anoe di pasi leupi keunong mbon
U muda lason buleun puasa
Manoe dalam krueng batee keu sabon
Masa ubeut lon sang sang baroesa

Jinoe ka asa teungoh uroe tron
Karab meusambong ngon uroe sinja
Rihon ngon rindu tinggai lam jantong
Hatee meuranggong soe deungoe hana

Ohnoe keuh dilee ca’e lon puphon

Jinoe geusambong deungon komenta

Teungku Samuti teuma awai fon

Leuhnyan geudukong Irul Pujangga

TGK SAMUTI

-------------------

Angen jipot memang meu alon
Bak U meuayen pucok meuputa
Keu wate ubit tanyoe di gampong
Memang ta rihon sampoe 'an tuha

Manoe dlm krueng bate keu sabon
Wate ubit lon pih na lon rasa
Ta giduek keube ujeun payong on
Nyan pih buet ulon 'oh woe sikula

Ticah on ubi kuwah on murong
Meunan di gampong cit ka beasa
Ta meu'en kandang sira tet jagong
Gaseng ta lambong pih göt jiputa

Jai that meuneu'en aneuk miet gampong
Meusoe han rihon wahe syedara
'Oh wate ka deuk yoh cut di gampong
Cit ie bu teupong geupeugöt le ma

Cagruk U muda geujampu jagong
Jeuleupak teupong pajoh 'oh asa
Cit le that macam peunajoh gampong
Wahe rakan lon han ék takira.

CUT LEM MAREUJAN

-------------------------------

Keu masa cut-cut teu ingat that lon
Meutulak panton di mingkuala
Nyoe keuh hiburan kamoe digampong
Motoe ulee tong peuleupeuk meuria

Hana suah bloe mainan gampong
Musem lam sithon meutuka tuka
Musem geulayang lamblang kamoe tren
Leuhop bak idong jipoe lam mata

Aneukmit jinoe beda hai abon
Watee ulang thon bak toko geuba
Cara seumeuget hanalei mufom
Manja geupeutren lei ureung tuha

Tanlei kreatif lagee di gampong
Peulom meupanton hantom jirasa
Jak meuseuraya tulong teumulong
Budaya gampong jinoe leh hoka

TGK.  SAMUTI

---------------------

Meunan cit kamoe wahe adoe lon
Wate di gampong bak saboh masa
Nyo tulong-mulong cit reusam gampong
Ngon mandum kawom keureja sama

Meunyo lhö pade hase saboh krong
Mandum jitulong le ureung lingka
Meunan cit tanyoe jak bantu kawom
Hana adoe lon harap beulanja

CUT LEM MAREUJAN

-------------------------------

Nibak malamnyoe sang puleh rihon
Meurumpok langsong teman lam maya
Pak Lukman Hakim  jinoe sajan lon
Gobnyan ka geutren keunoe u banda

Tgk. Samuti geutanyong bak lon
Tan lon jeut talipon seubab ka jula
Singoh bengoh mantong hai abon
Meunyoe sajan lon talipon teuma

Ngon Cek Medya pih nit meuhimpon
Kadang sigoe tren jeut tameujumpa
Leuh jak undangan geupeugah baklon
Kadang jeut langsong taduk simeja

Bak pak  Barlian kalon talipon
Sigoe meugabong  Mukni Lueng Bata
Teuma malamnyoe cuma sajan lon
Seubab gobnyan tren that tiba tiba

Hotel Grand Aceh AMD jurong
Panteriek gampong kamoe duek dua
Gobnyan meuhajat beupuleh rihon
Ngon rakan panton ca'e lam maya

IRUL PUJANGGA

----------------------

Leupi teurasa nyoe keunong ie mbon

Sampoe lam jantong mantong teurasa

Pakon jeut meunan wahei aduen lon

Neukarang panton oh malam jula

Watei lon baca ie mata jitren

Rasa diulon teuingat desa

Katreip sileupah tang lon eu gampong

Karap troh peut thon hinoe Malaya

Meutamah sunyi rangoe lam jantong

Jiteuka rihon lagee neurika

Haba neupeugah teupeih hate lon

Naksu u gampong laju lon gisa

CUT LEM MAREUJAN

----------------------------

Meu’ah hai adoe lon keun pue jitren

Asoe hate lon kadeuh u luwa

Meunoe lon rasa hai adoe payong

Seubab u gampong goh jeut lon gisa

Beuthat di banda jinoe di ulon

Karab dua thon ulon woe hana

Seubab cobaan jinoe ateuh lon

Saket ka meuthon ubat gohlom na

Ulon duek motoe ulee meuhayon

Payah ulon tren teurasa geumpa

Makajih hate sabei lam rihon

Neuk woe u gampong hana teunaga 

IRUL PUJANGGA

----------------------

Hana masalah wahei aduen lon

Nyoe meunan panton hana peukara

Teuma di aduen meupat keuh gampong

Kadang deungon lon teutangga desa

Pajan rencana  neuwoe u gampong

Aduen jak kunjong keudeh u desa

Beuthat pih tuboh ulee meuhayon

Mohon bak Rabbon beupuleh sigra

CUT LEM MAREUJAN

----------------------------

Meu’ah ka teulat haba meusambong

Beuklam HP lon batree ka mala

Jinoe lon jaweub asai di gampong

Teumpat lahei lon di Blangkuala

Aceh Seulatan disinan kawom

Di Meukek ulon sampoe SMA

Teuma di ayah di Bireuen gampong

Teumpat asai fon Paya Bieng Jangka

Menoe keuh kisah asai gampong lon

Jinoe dek payoeng sambong lei gata

Nanggroe Malaya na peut goe lon tren

Bak Doto Hamidon dudoe lon teuka

IRUL PUJANGGA

----------------------

Adak ka teulat rika neusambong

Lon maklum lei lon beuklam ka jula

Peulom HP neuh ka mate langsong

Batrei jih kalon tanlei cahaya

Meukru seumangat riyeuk meu ek tren

Keunoe meu apong u ming kuala

Ka ulon tupat ulon ka mufom

Akan keu gampong ayah ngon poma

Dari Utara leung tutue ayon

Dengon glei beutong sampoe Abdya

Nyan ban keuh jioh judoo geupeutren

Keu yah aduen lon lei Allah Ta’ala

Teuma u Bireuen peu seureng neukunjong

Neuwoe bak kawom di Aceh Jeumpa

Miseu na neuwoe neupiyoh baklon

Hinan aduen lon di Samalanga

CUT LEM MAREUJAN

----------------------------

Matang Geulumpang sabei lon kunjong

Peulom watee lon mantong that teuga

Di Samalanga na sepupu lon

Asai di gampong di Karieng desa

Tapi that sayang nasib adoe lon

Ka saket jantong woe bak Rabbana

Linto digobnyan mantong di gampong

Nan gobnyan ulon teu ingat hana

Insya Allah hai adoe payong

Kadang u gampong pajan lon gisa

Bak dron lon piyoh han lon peulangsong

Dron lon talipon troh Samalanga.

===========================

Dihimpon Kembali Di Kuta Radja

Tanggal 08 Agustus 2014

WASSALAM,

CUT LEM MAREUJAN

TGK. SAMUTI

IRUL PUJANGGA