BUDAYA SEUBAGOE TAMENG ERA GLOBALISASI

BUDAYA SEUBAGOE TAMENG ERA GLOBALISASI

BY:  CUT LEM MAREUJAN

Salam alaikom lon puphon kalam

Ngon Nama Tuhan Rabbul ‘Izzati

Seulaweut saleum ateuh Jonjongan

Sahabat sajan ngon ahlul baiti

Saleum ulon bri keu handai tolan

Keu bandum rakan tunong ngon pasi

Peungarang Ca’e  ban sigom alam

Seureuta sajan Krew Aceh TV

Keu Cek Medya saleum lon layang

Oh leuh nibak nyan ureung dampingi

Goh lom meurumpok ‘an leuh lebaran

Tan kesempatan silaturrahmi

Minggu ulikot lon kirem bahan

Beuthat Lon tuan hanjeut lon ili

Karena bacut na kesibukan

Ulon bak jalan hana deuh TV

Ca’e lon kirem lhe droe pengarang

Jinoe lon peutrang mangat neuturi

Nyang pertama phon Cut Lem Mareujan

Leuhnyan balasan Teungku Samuti

Teuma sidroe treuk Dek Muda Seudang

Nanggroe Seuberang Mita Raseuki

Irul Pujangga nama digobnyan

Rihon Lon karang geutem sahuti

Nibak kalinyoe sidroe lon datang

Lon ba karangan seorang diri

Padahai ramee nyang jok masukan

Sahut-sahutan ramee nyang hobby 

Naggroe geutanyoe sukee pejuang

Phon jameun Sultan sampoe an kini

Bideung Budaya tan ketinggalan

Inong ngon Agam muda ngon mudi

Di bideung ca’e ulon khususkan

Le that pengarang jinoe lon turi

Tuha ngon muda inong ngon agam

Le that tulesan keu lon geubagi

Nyang muda-muda kagum lon tuan

Geutem peutimang budaya seni

Hana meubacut gengsi lam badan

Bah jikeun JAMAN han geupaduli

Jinoe lon harap bak handai tolan

Nyang goh keumarang kajeut mulai

Tuleh peu mantong nyang jeut masukan

Asai beusopan junjong pekerti

Meunyoe kon tanyoe hiroe peutimang

Gop panee teuman jitem paduli

Budaya tanyoe keuneubah monyang

Pusaka usang beujeut lestari

Bak Pemerintah tanyoe harapkan

Na Perhatian keu bideung seuni

Beu geutem bacut bri perhatian

Akan seniman ‘et glah keu ruti

Hana ban mandum ureung lam alam

Nyang jeut keumarang deungon meurawi

Teungoh mantongna nyang tem keumarang

Neudukong rijang bek neupreih leupi

Meunyoe ka leupi hanpeu lei padan

Jiduek geuratan bijeh habeih jie

Budaya luwa keunoe troh datang

Tanna soe hadang meunyoe ka basi

Globalisasi seugala bidang

Keunoe ji datang manca negeri

Meunyoe geutanyoe tan persiapan

Atra awaknyan keunoe jibagi

Peukong budaya pih pembangunan

Kon Cuma jalan ngon Irigasi

Kaleuh teusurat wajeb jalankan

Lam undang-undang jeulah ka meuri

Dalam UUD cuba ta pandang

Ngon pendidikan teudong meuriti

Sidupnan penteng kebudayaan

Peujeut hai tolan geutanyoe sangsi

Peukeuh geutanyoe sep persiapan

Peugot sambutan GLOBALISASI

Atau tapreh-preh Aceh Lon Sayang

Siap jipulang  “ALA YAHUDI”

Meunoe lon tuleh dalam karangan

Deungon harapan na soe paduli

GLOBALISASI saboh tantangan

Hanjeut takeun han atra ka pasti

Watee saket ek tapeuget bagan

Bek sampoe meunan tanyoe hai akhi

Seudia payung sebelum hujan

Dak jeut beumeunan tanyoe jalani

Mari hai bapak unsur pimpinan

Rayek tantangan GLOBALISASI

Saboh bideung nyoe nyang ulon karang

Kebudayaan benteng negeri

Masalah laen hana lon karang

Miseu urosan bah ekonomi

Le that dum ahli nyang bri masokan

Doktor Lulusan Luwa Neugeri

Bideung budaya sinoe lon peutrang

Seubab lon tuan bideung nyoe hobby

Adak hana peng teutap lon layang

Meunoe panggelan jiwa meuseuni

Ohnoe keuh dilee lon peusep karang

Singoh lon riwang laen lon rawi

Keu bandum sahbat nyang tem keumarang

Salut lon tuan ngon siploh jari

Aneuk cem pala ateuh bak mancang

Dicung geulumpang jidong rapati

Meunyoe na salang ulon keumarang

Meuah hai rakan keulon bek beunci

Teman setia hanya bayangan

Hudep hayalan angan lam seni

Bahpih tanna peng di dalam reugam

Jiwa seuniman tak pernah mati

Jiwa penyair haus karangan

Menunggu ilham di malam sepi

Di Padang pasir miseu berjalan

Dumnyan hajatan keu sititek ie

Kuta Radja, 14 Agustus 2014

Wassalam,

Cut Lem Mareujan