BEEK MEUNGEULOOH

BEEK MEUNGEULOOH
By: Cut Lem Mareujan

Assalamu alaikom lon puphon ratooh

Jaweub rakan beh akhi ngon  ukhti

Nibak malamnyoe keunoe lon petrooh

Jak  intat bungkooh bak Aceh TV

Bak Cek Medya lonba sibungkooh

Haba peunyulooh lon cuba rawi

Mangat geubaca irama geubooh

Dak salah lon blooh hana leumah ri

Bandum pengarang barang gapat trooh

Saleum lon peutrooh tan keucuali

Keubandum sahbat hormat meusimpooh

Ngon jaroe siplooh saleum lon bagi

Nibak malamnyoe meunoe lon labooh

Rakan sireutooh lon jamak ISMI

Hana lon sapa nama ulon booh

Jeum ka poh siploh lon takot basi

Bacut lon peugah amanah lon booh

Bak rakan ratooh nyang ka lon ruri

Bek bagah bosan dalam meuratooh

Dakna nyang kirooh bek neupaduli

Lagee lon tuan tantangan katrooh

Keulon jitudooh “PEMBAJAK RAWI”

Bah keuh jipeugah jihah ngon jiprooh

Geutanyoe bekrooh keujih tacaci

Peukong budaya nyangka rab lurooh

Bek teupeungarooh gob jak halangi

Bah keuh beujikeun jangeun brooh putooh

Bek tatem piyooh dak beurang gakri

Wahei Ya Rabbi neubri beuteudooh

Peutunyok beutrook keu ureung deungki

Neubri beusaba hamba nyang halooh

Sipeut nyoe bek trooh bak rakan rawi

Buleun sikureueng taleung le that rooh
Bak buleun siplooh kadang roh bani
Meu’ah lontuan rakan lam ratooh
Lon ba peunyulooh lam bahsa seuni

Leupah that subra geunta su kirooh
Ureung meuratoh ngon peeh rapa i
Keu handai tolan lontuan peutrooh
Suai Meungeulooh di dalam Fbi

Kadang barokon hantom ulon booh
Seubab adoe beh gohlom that meuri
Tapi lawethyoe hoe hoe nyang lon blooh
Dalam sireutoh, peutplooh meunoe hi

Kadang geutanyoe bunoe na kirooh
Masalah haloh pih roh tanyanyi
Tapeugah peugah unggah seutatooh
Palak sireutooh laju tabagi

Sangsang bak facebook na makhluk halooh
Peumantong tabooh jawaban jibri
Ka taniet facebook peutunjuk tanggooh
Ngon lakoe riooh facebook keu kadhi

Memang tujuan atranyan phon troh
Teumpat meuratooh nyan BIEK YAHUDI
Dum keuluh kesah parah ngon halooh
Keunoe jibungkooh meunan phon rawi

Meunyoe awaknyan keunan dijak trooh
Weub leupah jioh peutunjok Rabbi
Hana jituhoe baksoe jipeutrooh
Seungsara tubooh yoh goh jibagi

Ureueng Iseulam lageenyan bekrooh
Tanyoe adoe beh meunan han geubri
Ngon poe taAllah sahbah bek jiooh
Peutoe rakan beh deungoh ilahi

Mulai jinoe tanyoe bek lei rooh
Sipeut meungeulooh peulom lam Fbi
Saba ka geuyu asa bek putooh
Syukur rakan beh nikmat nyang geubri

Beek na pikiran syaithan peungarooh
Sipeut meungeulooh jiooh SABRIHI
Kadang masalah leupah that halooh
Nyan pih meungeulooh birah han sakri

Kadang “SI DO’I” ka seu ie tubooh
“MALMING” hanatrooh dijak bak Nyakti
Nyan pih masalah peugah hoe nyang trooh
GALAU sireutooh sang “PATAH HATI”

Tanyoe meulakee lageenyoe bekrooh
Sipeut meungeulooh dakjeut bek geubri
Kadang ban sigoe ban motoe beurtoh
Leh hoehoe katrooh han tasyukuri

Kadang teubaba gaya meungeulooh
Hoehoe nyang geublooh HADOOH bak bibi
Kadang meujuta beulanja katrooh
Mantong geuratooh “GAK CUKUP GAJI”

Meunyoe bah donya mata that jiooh
U miyub han roh kalon u gaki
Tangah u langet pakon han trooh trooh
Leupah that jiooh u ateuh geubli

Bideung akhirat uyup ka geulhooh
Sangsang ka teumbooh droe lam jannati
Le that amalan sangsang kageutrooh
Hoe nyang jak gadooh geubangga diri

Meunyoe na tajak Suak Meulabooh
Siat tapiyoh di Alue Bilie
Mumada ohnoe jinoe lon piyooh
Heek that takayooh buhu ooh ngon i

Meunyoe na salah nyang ulon ratooh
Maklum rakan beh keulon bek beunci
Lon cuba-cuba haba peunyulooh
Dakjeut lon bek rooh dosa bak Rabbi

Kuta Radja, 02 September 2014
Wassalam,
Cut Lem Mareujan