SALAM ‘ALAIKOM AYAH NGON UMI
NYANG NONTON TV BANDUM SYEDARA
KEU HANDAI TOLAN SALEUM ULON BRI
MUDA NGON MUDI DUSON NGON KOTA
KEU CEK MEDYA DI ACEH TV
KEU NYANG SIBLAH WI PIH HANA LUPA
KEU BANDUM RAKAN SALEUM MEUTURI
KRU ACEH TV SAJAN LON SAPA
LON HANA TUWOE TEUNGKU SAMUTI
CEH SOFYAN LAGI NGON CEH MIN CAKRA
HABA MINGGUNYOE LAEN LON RAWI
PAKHOK LON BAGI UJONG
I NGON A
ANEUK BEURUJUK ATEUH BAK CAPLI
CICEM KEUDIDI ATEUH BAK BANGKA
HABA PEU INGAT BACUT LON RAWI
JUDUL ULON BRI ”SIBIJEH MATA”
LEUPAH THAT SAYANG SI MIRAPATI
UMPEUN TAN SOEBRI DI DALAM CINTRA
SIBIJEH MATA TAN SOE PEUDULI
AYAH NGON UMI DOK NGON KEURIJA
PEUGAWAI NANGGROE KEURIJA UMI
KEURIJA ABI WIRA SUASTA
BEUNGOH BEURANGKAT SUAMI ISTRI
KADANG KEUMBALI KA MALAM JULA
WATEE DI AYAH LEUPAH NGON UMI
TINGGAI NGON BIBI SIBIJEH MATA
MEUNYOE GOHLOMNA BANTUAN BIBI
TIGGAI NGON MAKCHI BAHPI KATUHA
NGON JAK SIKULA HANA GEUSANGSI
KEU SINYAK BINTI KA GEUBLOE HONDA
KEU ANEUK AGAM JATAH KAGEUBRI
MEREK SUZUKI ATAU YAMAHA
SUAI PAKAIAN PEUGAH BAK UMI
SAMSUNG GALAXI HP GEUMITA
SUAI PENG JAJAN PEUGAH BAK ABI
ON MIRAH GEBRI PENG BICAH HANA
HANA HAMBATAN BEULANJA GEUBRI
AYAH NGON UMI KEURIJA SAMA
PEUNYANG PEUREULEE BITHEE BAK ABI
KEU MINYEUK WANGI YUMJIH MEUJUTA
HANA TEUINGAT AYAH NGON UMI
KIBAN SINYAK TI NIBAK SIKULA
PEULOM KEUSUAI BIDANG MENGAJI
HUKOM ILAHI MUFOM PEU HANA
MEUNAN CIT SIGAM TANSOE PADULI
PESAN BAK BIBI GEUYU PEU AJA
GEUPEUGAH ENTREU KUTAMAH GAJI
KAPEUBEUT NYAKTI NGON BUJANG MUDA
GEUPEUSUB
KONTRAK ANEUK BAK BIBI
KADANG BAK MAKCHI GEUJOK SPK
TANNA AWASAN AYAH NGON UMI
PROYEK MEUNGAJI BIBI LAKSANA
DOKUMEN KONTRAK UROSAN MAKCHI
SPESIPIKASI SWAKEULOLA
GEUJOK PENG MUKA SIBULEUN GAJI
SEUNANG THAT BIBI JABATAN KANA
SIBOK SILEUPAH MITA RASEUKI
GEUPEUGAH DEUMI SIBIJEH MATA
GEUBOH ALASAN KEU BUNGONG GIRI
WATEE GOB SUDI ALASAN KANA
PAJAN TEUKEUJOT AYAH NGON UMI
WATEE POLISI TELEUPON GATA
JIPEUGAH SIGAM KA KEUNONG GARI
SAJAN SI ALI KA JIPIP GANJA
NIBAK SIKULA GURU JITAKI
LAKEE PEUMISI MEU UBAT MATA
PADAHAI DIJAK RUMOH SI ALI
JIMEU’EN JUDI SIRA PUB GANJA
DI SINYAK DARA GINCU BAK BIBI
SIPATU TINGGI MADE IN LUWA
JIJAK SIKULA PEUGAH BAK MAKCHI
RUMOH SI ‘AINI MEUSAPAT DARA
KA JIPUB SABU JI’UT EKSTASI
JEUHAK DEUNGON IE RAMINET NAMA
POMA NGON AYAH SIBOK TAN SAKRI
ANEUK MEUNOE HI GEUTEUPUE HANA
PEUKEUH DIGATA AYAH SI BENTI
BEUTOI SEUKALI PEUNA BEURITA
JINOE ANEUK DRON KANTO PEULISI
TOLONG KEMARI PANTAH BANDUA
ANAK SAUDARA NYANG LAKI-LAKI
JINOE TERBUKTI KEUNONG NARKOBA
SAJAN DI ADOE ANEUK NYANG PUTRI
BEDA LOKASI KAMOE DROP DUA
HANA LON KISAH OH LEUHNYAN PAKRI
TACOK NYANG INTI KEUTANYOE DUMNA
ANEUK TAPEULEUH TAN TAPEUDULI
LAGEE NYOE DALI AKIBAT KANA
BAH KEUSIBUKAN MITA RASEUKI
WAJEB PEUDULI SIBIJEH MATA
MENYOE HAN MEUNAN TUGAH TABAGI
BAHKEUH ISTERI DI RUMOH TANGGA
PEULOM MASALAH SUAI MEUNGAJI
HOKOM ILAHI ANEUK TA HAJA
BEK ROH JIPUBUT LAGEE LON RAWI
BEUNA PEUDULI GEUTANYOE TUHA
MEUNYOE KATAWOE TANYOE BAK RABBI
BEUJEUT HAI AKHI JIBACA DOA
SIBIJEH MATA DIDIKAN TABRI
HUKOM ILAHI JOK BAK ULAMA
BEK PEU SUB KONTRAK ANEUK BAK BIBI
PEULOM BAK MAKCHI GOBNYAN KATUHA
GEUTANYOE KEUDROE NYANG TANGGULANGI
SIKULA TABRI BAK BEUT PIH BEUNA
OHNO KEUH MANTONG LON TUAN RAWI
BAH LAEN KALI MEURUMPOK TEUMA
MEUNYOE NA SALAH PEUMEUAH NEUBRI
HABA LON RAWI KADANG NA CUPA
SIBAK KEUTAPANG BAK BINEH PASI
CICEM KEUDIDI SINOE MEUDODA
KEUBANDUM TOLAN SALEUM LON BAGI
SOE KA LON TURI UKEU LON SAPA.........
KUTA RADJA, 11 APRIL 2014
WASSALAM,
CUT LEM MAREUJAN
Tidak ada komentar:
Posting Komentar