SAMPÔH CHAT WA YANG HANA PEUNTÉNG

SEUMAMPÔH LHÈE URÖE SIGÖE

Lhèe uröe sigöe tapantöe WA

Bak ulôn rasa han sampöe gabuk

Tamöng jak sampôh brôh bak seulasa

Yang tan peuguna seubèe lam uruk

Meunyöe simunggu hana trôh teuka

Meu bak mushalla dianggap masbuk

Kon hana mungkén laén yu tunda

Dang prèh boh ara anyot dua neuk

Tinggai ta piléh berita duka

Ta ucap sigra bèk taprèh euntreuk

Ladum sit meuhat padat acara

Nibak keureuja leupah that sibuk

Memang takalon bangön syedara

Ka peupeu yang na lam grôup geupeuduk

Kadang undangan kon bandum warga

Ka geuba gamba dari phôn meuduk

Geubri undangan sit sidröe dua

Keupeu beurita bandum tajak cruk

Kadang weuh atée ilée ie mata

Wab ureung hana han rôh lam paruk

Ceuramah *anéh kok boléh* saja ?

Kadang tiep masa lam grôup geusipreuk

Padahai resah gundah gulana

Rap rata-rata hatè dak dik duk

Suai aqidah leupah utama

Kiban na cara yang meusinijuk

Hingga beu-aman tentram sijahtra

Hana léi dawa ayah ngön aneuk

Adak tatanyöng sang bingöng gaya

Lèh pura-pura han ék lôn jak luk

Meujan dalam grôup ka hugôp dawa

Lôn kalon hana yg jeut peujingeuk

Dalam aturan saban bèk beda

Gasin ngön kaya ikôt petunjuk

Ban gasin keunöng keumöng tatampa

Giliran kaya ta bujuk-bujuk

Caé lôn tuléh baréh tan rata

Maklum syedara kadang meusireuk

Nyöe na tautan jak taci buka

Sinöe na cara hai bapak ibuk

Klik CARA TANDA CHAT PEUNTÉNG

sehingga jeut tahapus yang hana peureulèe sekaligus.

-----

That na teuh, alasan hana meuteumeu kalon berita duka cita gara2 le that postingan anggota. Meunyöe tanyöe lam sibôk sabée, pakon han ta talipon admin group. Ta tanyöng 3 uröe sigöe peu na hai. Kon nyöe...? 😊

Koetaradja, 19 Juni 2022

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

HABA PEUINGAT

💓 *HABA PEUINGAT* 💓

Uröe jumeu'at rahmat meukatöe

Slaweut peusampöe akan jônjôngan

Haba peuingat meuhat bak lôn nyöe

Kon lôn peurunöe bri pelajaran

Meuheut beuseunang malam ngön uröe

Syarat bèk beu-öe, peujiôh utang

Ta syukôr nikmat ingat bèk lalöe

Bèk na meusigöe tinggai seumayang

Ngat bèk teugantuk teuduk lam sagöe

Peuget hobbi dröe jeut keuhiburan

Supaya gata bèk "plonga-plongo"

Beuna tathèe dröe tamat jabatan

Mita keurija hana brat sèe-söe

Beujeut but jaröe na keahlian

Na tanggông jaweub lam but tip uröe

Jujur bèk sampöe na kecurangan

Haba peuingat tasambat dudöe

Peumeu'ah meunyöe na kekurangan

Lôn cuma galak sajak meurampöe

Meunyöe keu asöe kureueng that bahan🙏

Koetaradja, 17 Juni 2022

Saleum Jum'at Berkah,

🆑Ⓜ️🅰️RJ🅰️♑

#CaeCutlem #CLMarjan #DakwahLamCae #JumatBerkah #PustakaSastraAceh #DiakritikBahasaAceh

👅 COK MUKA 👅

😜 *COK MUKA* 😜

Saleum horeumat keu sahbat dumna

Dari papua sampöe pulo wèh

Saboh karangan keu rakan sastra

Dari fans rika di banda acèh

"Jilat Menjilat" tabi'at kana

Gasin ngön kaya hana meudalèh

Peukateun lamit sit jipeularha

Meunan biasa hana lée anèh

Raya jabatan saban ngön kaya

Lidah sideupa sit ka teuprèh-prèh

Akan meurumpok awak COK MUKA

Leuh nyan yang rasa teu-seungèh2

Na kekayaan meunan sit hawa

Jabatan sama bukeuti sahèh

Yang panyang lidah bagah jimita

Untuk lih luka bèk jidöng agèh

Keuchik bak camat nikmat useuha

Sambông ceurita leuh nyan geuraèh

Meulanjut laju meuteumeu rasa

Sampöe *KAJARTA* kana adeurèh

Laén lom dinah tangah keupala

Ngat bèk jituka SK jipeuwèh

Lidah beupanyang keumang ngön raya

Mangat teurasa leupi lagèe èh

Meunan sit meunyöe tanyöe urg na

Dak tan sikula jitém keun berèh

Sit na yg deungöe jipeu nyöe haba

Geuntôt keuluwa jipeugah mamèh

Meusambông-sambông ulôn nging fakta

Hana pat dawa kadang pih leubèh

Meunyöe han sanggôp ikôt nyan cara

Manyang dikula jeut sèe u binèh

Tajak u jantho wöe rot krueng raya

Ka jeulah hana meurumpok sibrèh

Galak lôn rampöe lagèe nyöe rika

Bèk raya haba peureutée pangèh

Bak jameun jinöe rugöe sarjana

Leubèh le laba lidah tagalèh

Adak beuluwih lieh lom beuteuga

Sampöe teurasa beutrôh bak takèh

Koetaradja, 16 Juni 2022

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh

#DiskritikBahasaAceh

MEUNYÖE TAPEUGAH PAKON ?

💃 MEUNYÖE TAPEUGAH, PAKON ? 💃

Meunyöe tapeugah susah meuyanyi

Pakon bang joni jeut keu biduan

Meunyöe tapeugah susah meurawi

Pakon lam efbi le that karangan

Meunyöe tapeugah cidah ngön tari

Pakon tan siri yang ba tunangan

Meunyöe tapeugah luwah meutani

Pakon jeut capli wah blöe u Taiwan

Meunyöe tapeugah saboh yah mami

Pakon sang tiri deuh hana saban

Meunyöe tapeugah sidarah wali

Pakon meuturi tok ngön warisan

Meunyöe tapeugah leupah that ahli

Pakon mit gaji rayek pinjaman

Meunyöe tapeugah daerah syar'i

Pakon but keuji bak talöe jalan

Meunyöe tapeugah ka "smart city"

Pakon bayeu ie manual meunan

Meunyöe tapeugah gagah that waki

Pakon jitaki tiep-tiep urôsaan

Meunyöe tapeugah meudemokrasi

Pakon jeut anti kritik ngön saran

Meunyöe tapeugah meutoleransi

Pakon jeut bukti le penistaan

Meunyöe tapeugah nyunnah ban nabi

Pakon tacaci ureueng chik gobnyan

Meunyöe tapeugah ikôt salafi

Pakon wahabi deuh kelakuan

Meunyöe tapeugah awak kah sufi

Pakon teumaki sulét na sajan

Meunyöe tapeugah bid'ah maulidi

Pakon khanduri keu dron lhèe pingan

Meunyöe tapeugah beurantah judi

Pakon si ACI jeut peuget preman

Meunyöe tapeugah brantah korupsi

Pakon jeut jibri diskon hukôman

Meunyöe tapeugah mirah kuah ie

Pakon han taci reubôh ôn bayam

Meunyöe tapeugah na darah seni

Pakon han tabri bacut tambahan 😊

Koetaradja, 14 Juni 2022

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DiakritikBahasaAceh

KEU WAKI PLÉH FAMILI MANTÖNG

*WAKI PILÉH FAMILI MANTÖNG*

(Gop pih meunan jipubut)

Tameupolitik taktik beubaköe

Kalon Pak Bowo dg Mas Sandi

Calon presiden geutekèn KO

Akhée meusahöe geuduk keu mentri

Bèk tapeusaban gopnyan ngön tanyöe

Meunyöe hat rugöe reukung wah geuti

Modai yang abéh tuléh blah rugöe

Hana pat gantöe angka kwitansi

Calon gubeunu maju kali nyöe

Sama sit sigöe calon bupati

Keupala dinah han keumah gantöe

Peugawèe nanggröe syarat keurani

Uléh seubab nyan rakan sinaröe

Cok kalkulatöe ci kali-kali

Tamah ngön kureung bileung yôh jinöe

Jeut agak dudöe peukara bagi

Meunyöe tan meunang mumang bèk sampöe

Memang bak but nyöe peureuséh judi

Bandum harapan saban get lumpöe

Andalan "samo" but publöe janji

Tanyöe yang piléh nging waréh yang töe

Taniet geunantöe tulông famili

Kon nit lam hatée pikée keu tanyöe

Peu lom keu naggröe dröe tan jituri

Meunyöe jeut bantu laju tahiröe

Gamba taheungköe tatulông akhy

Tapi harapan teuman óh dudöe

Bèk peusomböng dröe sang tan meuturi

Tamita kerja pih brat lawét nyöe

Bah keuh ta ujöe lam demokrasi

Asai ka leupah glah keujih sidröe

Untuk geutanyöe jeut hana jibri

Meunan tujuan rakan sinaröe

Syarat disinöe pih hana tinggi

Hana jikalön IP ngön rapo (r)

Hana jipaköe university 😊

Koetaradja, 04 Juni 2022

Wassalam,

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DiakritikBahasaAceh

IJA DAH

📋IJA DAH ?📋

Walau "IJA DAH" leumah Paket C

Meunan sit IP bah keuh sa koma

Hana teujalok dalam lok padée

Sanggôp geupikée keu nusa bangsa

Hana léi model titel ngön IP

Jinöe peureutée yang meukuasa

Profesor Doktor pamor ka u glée

Hana rôh pikée akan negara

Bèk cuba-cuba gata seumambée

Jinging N.I.P can ji PHK

Bah pih neukalon bangon deuh ganjée

Dak pajôh hatée wah urôt dada

Patôt keuh nanggröe kacöe hana prée

Wab ureueng jahée tata keulola

Na ureueng caröng sanggöng ban padée

UU ngön PP takôt meulangga

Keubit that sayang sikeumang bangkée

Tiep-tiep thôn sabée keumang meubura

Leupah that malang sayang bukon lée

Yang déh seumikée jeut keu jeulata

Koetaradja, 04 Juni 2022

Wassalam,

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DiakritikBahasaAceh

K E L U A R G A

K E L U A R G A

Meunyöe keu ngön yang seutia

Kheun pujangga nyan bayangan

Tapi keu ngön alam nyata

Keuluarga tan bandéngan

Dak na laén mungkén teuka

Sidröe dua handai taulan

Dak sahabat lom syedara

Teutap beda hana saban

Peu lom meunyöe dröe ka tuha

Meunang RASA ngön PIKÉRAN

Gaséh sayang beutabina

Rumôh tangga keu andalan

Deuh takalon bangön nyata

Tanging fakta pengalaman

Le sahabat ngön syedara

Hana biza ngön KENALAN

Bèk takeun téh, pacut, miwa

Yang adöe a tanging meunan

Han peu hireun hai syedara

Akhée masa sit lagèe nyan

Peu lom meunyöe tan beulanja

Dak syedara jipeugah tan

Han jisanih bah pih beujra

Sakét teuga kon urusan

Tapi cuba meunyöe kaya

Dak ngön china get hubôngan

Tan masalah ngön agama

Hindu budha trôh protestan

Maka beujroh tapeulara

Keluarga beutapaban

Gaséh sayang hana dua

Bahagia punca sinan

Aneuk tiyông công bak pala

Leuk bangguna công bak asan

Peumeu'ah lông hai pemersa

Kadang gasa hana simban

Koetaradja, 03 Juni 2022

Wassalam,

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

BUT SEUMIKÉE KON MEUPAKÉE

*BUT SEUMIKÉE KON MEUPAKÉE*

Bak meuranggông tiyông pih jeut

Yang neujak but ci peuleumah

Tan rap até lôn meubacut

Nyöe awak ngeut han jiminah

Yang seumikée si gam bulut

Le jiteungeut rôo ie abah

Profesor doktor han jirekrut

Alèh hayut gadoh jatah

Meunyöe mantöng meunan sifeut

Yang meucút-cút tan söe peuglah

Kakeuh tateun keunöng peungeut

Yang ka sukreut inna lillah 😡

-----

Meunyöe syarat untuk jeut keu anggota DPR hana meu-ubah atau ditinjau ulang, sang meutamah hancôo laju... Seubab sinan yang peureulèe ureueng seumikée, kon ureueng meupakée.

Koetaradja, 31 Mei 2022

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DiakritikBahasaAceh

ALHAMDULILLA WA SYUKRULILLAH

*ALHAMDULILLAH WA SYUKRULILLAH*

Syukur ta ucap meuhat bak Allah
Ka lom meutamah bungöng mangat bhèe
Leuh jeumpa putéh di KODAM indah
Lom jeumpa mirah di UTU teuntèe

Bit ureueng Meukek ceureudék leupah
Kon tanyöe peugah dak gop pih jithèe
Meunyöe di luwa nyata deuh kiprah
Jeut lop seujarah phôn jameun dilèe

Di tingkat pusat lam pamarentah
Tingkat sa meugah kon sit dua lhèe
Di tingkat dua han peu ta peugah
Kepala Daerah mampu geupangkèe

Dalam TNI cuba ci tangah
Panglima gagah nyan ureueng panèe?
Hanjeut ta itöng keupala dinah
Emban amanah pimpin gop ramèe

Seubab di luwa meukarya mudah
Nyata glah langkah wab caröng ulèe
Hana nyang iri deungki fiteunah
Bukeuti jeulah caröng "awak kèe" 😆

Tapi nyöe seumpat dalam wilayah
Na saja ulah nyang ba rameunèe
Sabéi kedröe-dröe jitém meu-ulah
Asai bèk keukah jeut hana keu kèe😜

Andai pilkada jameun kon jis'ah
Sang tan seujarah Meukek keu ulèe
Meunurôt dali lawét nyöe leumah
Keu calon hôm lah ngön surak tupèe

Padahai bangga geutanyöe leupah
Meutamah gezzah Meukek jeut tirèe
Adak tan jibri kupi saboh glah
Jibeudoh marwah han talôo bulèe

Ô ya qadirôn Pöe lôn ya Allah
Neutabu rahmah kamöe meulakèe
Neubri beumakmu Meukek thayyibah
Deungki qianah bagah meuseubèe

~~~~~

Alhamdulillah....
Leuh Kodam ureung Meukek,  ban nyöe ka teupilèh löm ureung Meukek  keu Rektor UTU Meulaboh.  Selamat....  Semoga berkah....

Koetaradja, 21 Mei 2018

By: 🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DiakritikBahasaAceh

KISI-KISI UJIAN

🌷 *KISI-KISI UJIAN* 🌷

Rakan tan léi na syedara pih han

Tok treuk harapan lam keluarga

Beulanja hana teunaga pih tan

Contöe ujian bak Pöe Rabbana

Meunan umpama lôn ba tamsélan

Soal meunöe ban kon léi rahsia

Nyöe kisi-kisi bri penyegaran

Gunci jawaban bagah tamita

Teuntèe na hikmah Allah bri meunan

Sabab cobaan kaleuh geu kada

Tiep-tiep yang geujôk trôk kemampuan

Hana ujian leubèh keu hamba

Allah geu-ujöe geutanyöe insan

Teutap lam iman seureuta saba

Atawa jatôh lurôh meutimphan

Óh pengumuman nan tan keuluwa

Ya Allah Rabbi neubri harapan

Bèk rôh lôntuan jeut putôh asa

Hana lôn hajat pangkat jabatan

Hana tujuan beu udép kaya

Yang kamöe pinta Ya Allah Rahman

Kebahagiaan akhirat donya

Teutap lam ta'at seulamat iman

Aman tenteram lam rumoh tangga

Di dalam hudép sép kebutuhan

Bèk rôh meusajan di dalam riba

Bak but korupsi bèk neubri keunan

Bèk jeut bagian but aniaya

Mumada óh nöe rampöe ujian

Mudah-mudahan jeut tapeuguna

Meunyöe sipakat hajat pih saban

Meusajan-sajan ta aamiin do'a

Yang hawa jabatan bèk neu aamiin beurangkahöe... 😂

Koetaradja, 31 Mei 2022

Wassalam,

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

SALAH DZAMIR

SALAH DZAMIR

(KELIRU KATA GANTI)

Lam bahasa sit na dzamir

Na mustatir atau nyata

Dak tajak beut trôh u mesir

Wah peumahir lom bahasa

Saraf nahu bèk kuatir

Baca tafsir mangat lanca

Hingga hana kucar-kacir

Bathin dhahir ka siaga

Basa inggréh gléh mengalir

Han wah jubir tuléh baca

Dak tapeugah basa kafir

Geukheun nyinyir ban tarasa

Lôn neuk peugah bah lam syair

Kon lôn sindir tapi fakta

Hingga lôn "tak naik pikir"

Geubôh dzamir le meutuka

Lam ceuramah peuhah tafsir

Jeut neu sortir salah beuna

Óh geusurah bak yang hadir

Salah dzamir tan geukira

Geupakèk "neu" ukeu hadir

Meuhat dzamir "anti" / "anta"

Harus jih "geu" sinan hai sir

Sama dzamir "huwa" / "hiya"

Kesimpulan:

Ramèe Teungku Aceh yang mahir tentang kaedah bahasa Arab dan bahasa Inggréh, tapi jayéh keu kaedah bahasa Aceh. Khusus jih dalam penggunaan dzamir (kata ganti).

Wallahu a'lam....

Le teungku watèe geusurah kitab lôn deungöe meunöe:

Contöe kalimat yang keliru:

Nabi "neumeusabda" ;

Allah "neumeukalam" dll.

Perhatikan:

"neumeusabda" dan "neumeukalam" meugandông dzamir "droneuh" atau "kah" (engkau), lam basa arab "اَنْتَ"

Dalam istilah bahasa Indonesia disebut "orang kedua tunggal".

Seharus jih yang beutôi nakeuh: Nabi "geumeusabda" ;

Allah "geumeukalam". 

Karena dalam kalimat "geumeusabda" dan "geumeukalam" meungandông dzamir "gob nyan" atau "jih" (dia), lam bahasa arab "هُوَ"

Dalam istilah bahasa Indonesia disebut "orang ketiga tunggal".

-----

Mohon ma'af atas kekurangan dan terima kasih jika ada kritik/saran.

Koetaradja, 28.05.2022

Wassalam,

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

RUMUS UDÉP

🌷 *RUMUS UDÉP* 🌷

Di dalam udép wajéb tarasa

Antara dua "seunang" ngön "seudéh"

Ka meunan geubri dali keu hamba

Matematika pih tan meulanggéh

Udép ngön cinta nyata bahgia

"Kata Pujangga" pihna meutuléh

Lagèe bak lagu Rhoma Irama

Bak group soneta kaleuh jiriléh

Teutapi kiban meunyöe tan cinta

Teuntèe teurasa leupah that peudéh

Peulom ta udép lam rumoh tangga

Meunyöe tan ridha teuntèe meupayéh

Ibarat taman nyan "tanpa bunga"

Meunan umpama hai dék putéh gléh

Hana seumerbak rancak bak mata

Hampa teurasa hana beureutéh

Tinggai geutanyöe baköe keulola

Nyan romantika lam kuwé lapéh

Peureulèe mamèh tatamah saka

Tabeu bôh sira gaséh-meugaséh

Tasyukur nikmat syarat harus na

Tapasang saba seubagöe bintéh

Sit meunan bagöe tanyöe lam donya

Dang-dang tagisa akhirat keudéh

Dari Simpang Peut jeut sit taputa

Blang Teungöh tanda ban Blang Beuladéh

Caé lôn jurut bacut na gamba

Meu'ah aksara lam basa Inggréh

Gantöe latihan karangan maja

Di dalam sastra lôn sapa waréh

Peumeu'ah Cutlem mungkén na cupa

Bèk neupeudesya meu-ubée puréh

Koetaradja, 20 Mei 2022

Wassalam,

🆑Ⓜ️🅰️RJ🅰️♑

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

TEURIMÖNG GEUNASÉH

*TEURIMÖNG GEUNASÉH* ?

Awai-awai lôn han tom lôn teumèe ucapan yang simakna deungön *TERIMA KASIH* dalam basa aceh. Ureueng aceh biasa menggunakan *ALHAMDULILLAH* sebagöe ucapan dengan maksud yang sama/rap2 sama deungön *TERIMA KASIH*.

Akhée-akhée nyöe ka meu-eu-eu (ikut-ikutan) menggunakan *TEURIMONG GASÉH* yang hana laén nakeuh *MENG-ACEH-KAN KATA TERIMA KASIH* .

Hai nyöe mungkin bisa mudah jiteurimöng umum, karena makna jih mantöng jianggap sama deungön bahasa yang asli.

Lam masa-masa komplik aceh, istilah *TEURIMÖNG GASÉH* ka "geumodifikasi" lom uléh kalangan "tertentu" yakni *TEURIMÖNG GEUNASÉH*. Meuteu-oh leubéh fasekh nah... 😜 Sang indatu ureueng aceh awai meunan geukheun si-uröe-uröe😊😄😊

Meunurôt lôn *GEUNASÉH* lam basa aceh saban arti jih ngön *KEKASIH* dalam bahasa indone. Bisa saja meumakna "pacar" / "boh hatée" bahkan jeut sit bermana pasangan tanyöe... *Laköe/Binöe*

Jadi TEURIMÖNG GEUNASEH ?

- Terima (lah) kekasih (ku) ?

- Terima (lah) isteri/suami (ku) ?

Hôm keuh hai...

Uléh seubab nyan lôntuan hana tom lôn peuguna istilah *TEURIMÖNG GEUNASÉH* nyan. Palèng that meukarat hana meupeu kheun, ya lôn kheun *TEURIMÖNG GASEH* mantöng. Tapi teutap leubéh kayém lôn peuguna *ALHAMDULILLAH* .

Mungkin na yang jeut mencerahkan lom, atau bahkan na pandangan laën. Alhamdulillah 🙏

TEUJEUBAK BEASISWA

*TEUJEUBAK BEASISWA*

Meumacam bagöe lawét nyöe nyata

Meubagöe cara teungöh jipeujak

Nyöe salah-salah jeulah meuraba

Leupah jai dana keunan jihamak

Miseu lôn peugah lam donya maya

Jai that media höe2 yang tajak

Facebook instagram awak nyan puga

Youtube meuseu-a meumacam corak

Meunyöe pondasi sangsi tarasa

Bideung agama jameun tan tajak

Nyöe calon korban sasaran tuba

Kaleuh jidata rumôh ngon barak

Leuh nyan aneuk mit yang muda2

Ayah deungön ma meunyöe deuh pa'ak

Nyan sit ka jeulah mudah jimaba

Wab hana daya ureung chik tulak

Mudah jilisi rôt hobbi pihna

Hana tasangka taku jibôh pak

Dalam keulompok culok anggota

Sumpah seutia keu tanda kompak

Yang rap pansiôn dua thôn masa

Nibak keurija tanyöe jitém jak

Duk keudèe kupi jibri ie saka

Budi bahasa sang adék kakak

Meunyöe na dasar jisasar hana

Wab sia-sia hanjeut peujinak

Wab jroh i'tikeut geujak beut pihna

Han leluasa dakwah jeut jisak

Cara yang laén lazém deuh nyata

Rot beasiswa leupah seumarak

Peuget seleksi jibri biaya

Trôh nanggröe luwa brat jipeuleumak

Jibri pèng saku laju han reda

Hana biaya sikula tajak

Leuh nyan meuikat meukeumat jasa

Kiban lom cara keuneuk beurontak ?

Maka bèk hireun wahée syedara

Yang wöe di luwa ka beda watak

Kadang ureueng chik ka dijeit dawa

Ibadah yang ka jikheun geutulak

Bid'ah takfiri hanyi lam haba

Bandum 'ulama jipeugah rusak

Seubab gurèe dröe jih meunöe cara

Sit teumeureuka keupada bapak

Meunyöe keu suai bhah beasiswa

Kaleuh lôn rasa aneuk lôn peujak

Teuleuh dua thôn lôn yu keuluwa

Duk lom tingkat sa bèk jipeubudak

Minah höe laén ulôn tém saba

Bah keuh biaya tanggông ban sibak

Seubab 'aqidah hanjeut peugala

Meunan syedara wah kamöe farak

Maka beuingat sahbat syedara

Keu beasiswa beuget that simak

Dari pat sumber söe yang bri dana

Salah lembaga bisa TEUJEUBAK

Ramèe that sisat dalam media

Channel bahaya bèk rôh tagalak

Peu lom jiteumèe jama'ah kaya

Jisupport dana meu-amak2

Mumada 'ohnöe rampöe lôn rika

Seubab watawa bukon teukeuchak

Meunyeusai dudöe hana lèi guna

Jinöe peularha yôh goh fak luyak

Koetaradja, 21 Feb 2022

By: Cut Lem Mareujan

#CaeCutlem #CLMarjan #PustakaSastraAceh #DajwahLamCae #DiakritikBahasaAceh

=====

*Sbg contoh:* Aneuk kandông lôn ka 2 thôn kuliah di salah saboh *Lembaga Tertentu* dengan beasiswa penuh (ditanggung sampai ke uang saku). Leuh jisadari le keanehan2 dalam pembelajaran, akée jih jiteubit dan ikôt test di lembaga laén (ulang dari nol lom). Semoga jalan yang ditempuh mendapat ridha Allah...

A D A B

*A D A B*

Tabu bijèh prèh kutika

Bèk jiteuka geusöng lam blang

Saleum mamèh keu pemersa

Saboh rika lôn ci karang

Le that tanyöe adab hana

Jak sikula manyang-manyang

Sopan santôn han meuhöe ka

Jipeudata miyup manyang

Han jitëm kheun lom sayyidina

Keu maulana brat kon wayang

Pak ngön Mister hana dawa

Keu beulanda trôh pak jeupang

Hana hormat keu maulana

Kiban cara kheun nyunnahan

Nyan kakeuh hôm hak digata

Tan meupaksa han kakeuh han

Memang adab bak phôn mula

Lam agama han jeut leukang

Rôt ileumèe leumbôi dua

Yang leumbôi sa adab memang

Kadang tanging lam group WA

Dakwah jiba yang meuneuntang

Teungöh rakan dalam duka

Trôh jih jak ba lom jeulatang

Ban leuh tahlil rumoh si "A"

Tinggai donya yang geusayang

Meukhanduri alakada

Baca do'a na yasinan

Gohlom limöng mantöng tenda

Trôh geujak ba da'i kondang

Gorèe gobnyan yang geubangga

Seudông muka janggôt panyang

Geukheun bid'ah dalil hana

Lam nuraka lom geu ulang

Han jipikée kiban rasa

Keluarga si mendiyang ?

Yang paih geutrom nibak muka

Lah geujaga perasaan

Seubab adab digopnyan na

Hana sama lagèe si "nyan"

Peuget molôd na acara

Galang dana ngön sumbangan

Bukôn ikôt bée na daya

Lam group jiba lom tautan

Molôd bid'ah lom trôh teuka

"Sang Idola" lom geutayang

Dakjeut bateu lèh acara

Panitia geujak tantang

Hana adab jeut keutanda

Tata krama hana sajan

Meunan watak jipeularha

Hingga hana kesadaran

Dum höe tajak bijak beuna

Adab jaga dalam kawan

Beuna mufôm suasana

Bèk gop duka gata tindan

Teungöh ubeut aneuk aja

Bèk teuba-ba beurangkajan

Meunan tugah ureueng tuha

Rumoh tangga phôn didikan

Aneuk tiông công bak pala

Gang-gang dama công bak saban

Lakèe meu'ah meunyöe gasa

Jeut teurasa keu-eung masam

Koetaradja, 18 Feb 2022

By: Cut Lem Mareujan

#CaeCutlem #CLMarjan #PustakaSastraAceh #DakwahLamCae #DiskritikBahasaAceh

P A T Ô T

P A T Ô T

Ladum tacah ladum cibôt

Ladum cukôp ngön tapèh-pèh

Ladum leuh cah payah tatôt

Ladum cukôp ngön tapeuwèh

Geukheun laréh abéh lagot

Geukheun sangkôt kon diyup mèh

Geukheun "tegas" kon ceumarôt

Geukheun leumbôt bukon laèh

Meunan mufôm wahée yah lôt

Adak neudhôt lôn han beungèh

Seubab saba, leumôh leubôt

Na meuseubôt dalil sahèh

Tutôo gasa hana patôt

Bèk taikôt hai Teungku Syèh

Sunnah nabi ci peuturôt

Bèk muka krôt beuna rumèh

Di dalam prang parang ta bôt

Bèk meupunjôt ban surèe èh

Sunnah Nabi nyöe taikôt

Bukon janggôt yang teuleubèh

Uröe peukan kalang kabôt

Trôh bak cipôt na di Sibrèh

Lakèe meu'ah jaröe lôn bôt

Ca'e lôn tôp saleum mamèh😜

Koetaradja, 17 Feb 2022

By: Cut Lem Mareujan

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

K A Y A ?

🌟 K  A  Y  A  ? 🌟

Meunyöe sinöe dalam donya

Hudép kaya nyan dambaan

Le sahabat lom syedara

Yang cok muka pih lumayan

Na söe sanjông lagèe raja

Na yang bila lam urôsan

Jeut tapubut kiban hawa

Jeut meulangga lom atôran

Adak salah tan söe dawa

Na yang puja bagöe sultan

Jeut ta atôo kiban hawa

Na beulanja peuget reman

Trôh lam kubu laju beda

Yang na taba ija kaphan

Leuh nyan bintéh dum sikada

Tok keureunda yang na sajan

Hana pat lée pasang gaya

Han jeut taba kekayaan

Trôh lam tanoh gadoh bangga

Hana raja ngön seulôtan

Yang ta tinggai dalam donya

Balék nama jeut warésan

Kadang-kadang jeut keudawa

Tamah jeumba lom hukuman

Dari panèe jih jiteuka

Kiban cara pendapatan

Leuh nyan höe-höe tapeuguna

Hana reuda pertanyaan

Peukeuh haleu atau hana

Jampu riba atawa tan

Peu na beutôi takeulola

Bah agama rôh atra nyan ?

Uröe dudöe palöe teuka

Trép leupahna bak hitôngan

Watèe jiduk lam neuraca

Kira-kira yakin aman ?

Muhasabah jinöe cuba

Bèk that bangga kekayaan

Jeut tapubut kiban hawa

Lam nuraka prèh balasan

Tapi meunyöe get kelola

Contöe pih na bak Sulaiman

Hana somböng beuthat raja

Na syuruga sit di sinan

Tatém tulông ureueng papa

Keu syedara tatém paban

Lôm i'tikeut tapeulara

Bèk tatuka beurangkajan

Jinöe katrôh watèe asa

Bak mushalla meusu adzan

Ngön mendadak lôn tôp rika

Samböng teuma bak laén jan

Koetaradja, 16 Feb 2022

By: Cut Lem Mareujan

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

SEKILAS CIRI-CIRI WAHABI

*C I R I  W A H A B I*

Keu rakan bandum saleum lôn bagi

Yang na lam efbi group WA beutrôh

Nyöe lôn calitra tanda jeut meuri

Mangat taturi toh bataih lampôh

Meunyöe tapandang ruman wahabi

Teubayang èk mi jih keupeunajôh

Leuh nyan peunyakét meulilét deungki

Ureueng chik nabi kaphée jitudôh

Keu Pöeta Allah jipeugah musti

Ateuh kurusi sabée geupiyôh

Meuhajat teumpat sang zat ilahi

Mujassim asli di dalam ratôh

Nyöe kesimpulan lôntuan kaji

Maka hai akhi dak jeut peujiôh

Awak nyan ustadz meuhat na gaji

Tiep-tiep provinsi meurumpok tungkôh

Dicok sasaran yang tan meungaji

Yang tan paduli ureueng chik gadôh

Hana pat teugah ayah ngön ummi

Lalöe ngön piti han teudôh-teudôh

Lom pensiunan padan keu santri

Seumangat jibri sira jitumpôh

Na jalan potöng tamöng jannati

Ajaran sunni ka diyu sampôh

Kadang jipadan gobnyan wéng gari

Bak keudèe kupi teumpat peuniyôh

Ngön keluarga ka hana rapi

Seubab tan hobi itangèn kayôh

Keunèng beuhitam saban bandum hi

Janggôt nyan musti hanjeut hana bôh

Watèe tapandang sang teungku haji

Ta sangka mufti ahli tasawôh

Bak penampilan sang2 sit syaikhi

Meuteu-oh ahli kitab meureutôh

'Oh tateumanyöng bingöng han sakri

Ingat hai akhi bèk meuklok leupôh

Keutanyöe awam nyan ciri-ciri

Beu hati-hati bèk salah labôh

Tajak meugurèe ilmèe bèk sangsi

Deungön wahabi bèk teupeungarôh

Mumada 'oh nöe rampöe lôn rawi

Geunantöe lôn bri panyot peunyulôh

Beujeut keu lampu bèk jihu blah wi

Seubab wahabi paléh beureutôh

Koetaradja, 07 Februari 2022

By: Cut Lem Mareujan

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

N G Ö N

*N G Ö N*

Limöng ribèe kira-kira
Ngön lam maya kadang leubèh
Limöng reutôh na kolega
Sapat keurja bak pé èn èh

Makén umu tanyöe tuha
Ngön yang kana tamah laéh
Na yang ka wöe bak rabbana
Padang mahsya sidéh geuprèh

Jinöe bandum tinggai sisa
Ngön sikula lèh pat adrèh
Dak na sahbat sidröe dua
Hana trôh sa treuk yang bèrèh

Hana peunténg ngön meujuta
Sodröe saja asai shalèh
Jitém peugah yang sibeuna
Lom seutia nyan teuleubèh

Kualitas yang utama
Jumlah hana jeut meudalèh
Adak ramèe kupeu teuma
Yang na bala watèe beungèh

Alèh peu-peu ka lôn rika
Gura-gura yang bèk seutrèh
Meunyöe na jeut neupeuguna
Meunyöe hana tik uyup mèh

Koetaradja, 27.01.2022

By: Cut Lem Mareujan

#CaeCutlem #CLMarjan #PustakaSastraAceh #DiakritikBahasaAceh

ULAMA IDOLA MASA KINI

🌺💓Ulama Idola Masa Kini💓🌺

السلام عليكم ورحمة الله وبركاته

Saleum lôn bri keu pemersa

Tuha muda saleum mamèh

Saleum sihat meuhat doá

Ngön karona bèk na teupèh

Jinöe siat nyöe idola

Yang diluwa nanggöe atjèh

Dalam nanggröe jai leupah na

Dum 'ulama sinöe bijéh

Nyöe seuramöe hai syedara

Mufôm makna hai teungku syèh ?

Lagèe rumôh nyan umpama

Nyöe seulasa that teuleubèh

Kön seuramöe Amerika

Hana sama ngon Bangladèh

Seuramöe Makkah tanôh mulya

Jeut neubaca kitab tarèkh

Bijèh laén jeut bèk pula

Laku hana hèk neuraèh

Yang na rusak dum syedara

Bijëh ganja jeut neupuwèh

Timang-timang 'oh jimaba

Bèk that hawa neuh yang anèh

Bèk neupikée nyan haluwa

Èk mi tuha dalam toplèh

Nging u ateuh söe syaikhuna

Gasin kaya tan meudalèh

Bèk 'aqidah neuh jiputa

Wab jigoda lèi surèe èh

Ta meulakèe bak Rabbana

Beusijahtra dalam shalèh

Husnul khatimah nyan utama

Dalam ridha sabée taprèh

Trôh seulimum wét krueng raya

Kakeuh hana liwat sibrèh

Ngön wassalam lôn tôp rika

Dak na gasa bèk rôh beungèh

Koetaradja, 25 Jan 2022

By: Cut Lem Mareujan

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

BUT PEUCRÉE BRÉE

🪴*BUT PEUCRÉE BRÉE*🪴

Meunyöe posting lôn nging oke

Ikhlah hatèe lôn that harok

Ék lôn komen sabée-sabée

Stiker sarée ulôn keutok👍

Tapi meunyöe but peucrée brée

Lam2 atée teuka sokmok

Peulom nyöe but mita pakée

Dalam WC ulôn culok 😜

Kadang rakan dang tik kawée

Bèk ta gulée lam ie tukok

Bèk teungöh gop jimeudikée

Ngön karoké tajak pupok🎤

Dalam kawan beujroh pi-ée

Dak jeut bèk lée keunöng peucrok

Gamba porno bèk lam HP

Salah rugée kamöe cabok🤕

Hanjeut latah peugah kafée

Bid'ah bèk léi tajak h'ok-h'ok

Kon hebat that taseumikée

Bèk tataksée bandum "goblok"🦧

Khilafiyah keubah di glée

Sajan partée neupeuget blok

Lam group WA beda molée

Bèk lah sabée ulok-ulok🙏

Bhah i'tikeut kon seupélée

Jitém matée tanggông luhok

Beuthat kaya raja tokée

Trôh hat matée han jeut sogok💎

Gura-gura rika caé

Lôn ci lansée haba cagok

Dalam lawak tasak "cabèe"

Capli awée taci geusok🌶️

Koetaradja, 25 Jan 2022

By: Cut Lem Mareujan

#CaeCutlem #PustakaSastraAceh #DakwahLamCae #Cagokproduction #DiakritikBahasaAceh

ASAI KA ANTIK

*ASAI KA ANTIK*

السلام عليكم ورحمة الله وبركاته

Saleum horeumat sambat syedara

Di alam maya salam 'alaikum

Dang2 lôn teungeut meuheut lôn rika

Dang2 lam tika ulôntuan bum

Mantong bahasan lam fenomena

Di alam nyata jinöe ta tunyum

Meubagöe tingkah ulah manusia

Dum beusöe tuha jinöe ka meuyum

Asai yang antik reuhik jimita

Abéh biaya ka hana meudum

Dak tan manfa'at nikmat jirasa

Wab jeut keubangga beda ngön umum

Meunöe rameunèe ramèe lagoina

Rap rata-rata meunan peukateun

Hana masalah moto ngön honda

Trôh bah agama sinan lôn hireun

Binatang laôt macam eungkôt na

Pakon jeut hawa neupajôh bukum

Le that yang patôt ikôt ulama

Pakôn tamita harus yang meuglum

Tobat ta deungöe uröe seulasa

Rabu beulaja lam kurikulum

Bak uröe amèh ka salèh gaya

Jum'at syaikhuna kajeut keu imum

Bak uröe sabtu laju na fatwa

Bid'ah ubée na huwa huma hum

Yang laén salah peugah dröe beuna

Asöe nuraka antunna antum

Ingat beu-ingat sahbat syedara

Bèk bagah raya geutanyöe talum

Takalon beutrang kiban sibeuna

Peu missi jiba beuna ta maklum

Deungön wassalam malam kajula

Keu tanda mata geunantöe kultum

Kadang na salah meu'ah lôn pinta

Bèk neupeudesya syahra lôn bandum

Koetaradja, 16 Januari 2022

By: Cut Lem Mareujan

#CaeCutlem #CLMarjan #PustakaSastraAceh #DakwahLamCae #DiakritikBahasaAceh

KUPEU WAH KARTU ARÉE ?

*KUPEU WAH KARTU ?*

Keu rakan rawi ulôn bri saleum

Keu gurèe jangeun pantôn ngön nazam

Timu ngon barat seulatan bandum

Teumbôh lam uteun trôh ban saboh nyan

Seubab na tokée gambée jeut meuyum

Dak han lam uteun hana söe gulam

Seubab hana prée jeut lahée oknum

Ci gratih bandum panèe bijéh nyan

Dumsöe yang sakét wajép peureumeun

Naksu beusanyum swasta layanan

Meumacam kartu lôn eu tan meudum

Kupeu lam balum sireubèe macam

Rakyat lam nanggröe dumsöe beu umum

Pakon jeut ladum tajôk atra nyan

Han suwah kartu hai apa ma'un

Tugaih dron bandum dalam atôran

Lam pendidikan saban sit hireun

Na kartu jikheun caröng söe simpan

Léh panèe cara pusaka dukun

Kartu lam balum dumpeu jaminan

Ide dari söe meunöe peukateun?

Peu bangai bandum dalam kawan nyan?

Di teungku waki but "upie" rugum?

Beutôi lagè kheun teungku ramuan?

Astaghfirullah madah rap su-um

Lah na lôn makeun ubat peuneunang

Payah ulôn 'ut zollof fresium

Ngön sibellium bèk tamah mumang

Mumada óh nöe rampöe lôn rangkum

Keunöe lôn bulung jeut keu bacaan

Meunyöe na silap harap neumaklum

Neupeunyum-peunyum dipat tan simban

Koetaradja, 14 Januari 2022

By: Cut Lem Mareujan

#CaeCutlem #CLMarjan #PustakaSastraAceh #DiakritikBahasaAceh

CAÉ SANGGAMARA

CAÉ SANGGAMARA

Di blagkuala makwa teumiréh

Di blang beuladéh péh parang raya

Jeum istirahat siat sira éh

Caé lôn tuléh keu sanggamara

Bèk ulah tanyöe rugöe meulapéh

Ka rôh gop patéh dakwah yang taba

Han tom lom tamat kitab tan baréh

Sang malém abéh hireun lôn kanga

Nit mita fahla raya bée beutéh

Meurumpok paléh raya ubée pha

Bideung agama hana jeut langgéh

Beucaröng piléh ta tiek lam WA

Watèe yôh ubeut bak jak beut jayéh

Teumakôt peudéh udép meurana

'Oh ban ka tuha janggôt ka putéh

Hawa gop patéh sang2 syaikhuna

Jameun di Acèh berèh beureuséh

Aliran paléh hana dijeut ba

Tapi lawét nyöe kutöe meupayéh

Hana söe tangkéh lagèe ie beuna

Masa tsunami meuri beureutéh

Atra awak jéh keunöe dum jiba

Meunöe tindakan han abéh-abéh

Dari uröe jéh misi nyöe kana

Jiba peungarôh halôh that lipéh

Kupi ngön kuwéh bri cuma-cuma

Jisak seun bacut jicúet bak gatéh

Jiculok puréh fitnah jipuga

Mudah ta tanda si jeumpa putéh

Meubeda abéh ngön meulu cina

Jeulah ta tanda yang ka dicuréh

Meuri jih jayéh akan 'ulama

Yang kon ustadz dröe dumsöe jak keudéh

Kirèe ngön ilèh kuréng jitanda

Hana jideungöe pöe nyöe ngön pöe jéh

Tok jih beureuséh tamöng syeuruga

Meunan i'tikeut jeuheut teulukéh

Aqidah figéh jeulah that biza

Dijeut kheun kafée sarée jisapéh

Dröe jih yang perséh nyunnah lagoina

Tugah ka jibri bagi peureuséh

Atra jih tuléh sipreuk beurata

Video singkat le that meuseupéh

Han abéh-abéh wab jai that dana

Ustadz digaji le jibri gratéh

Sarana meucéh leungkap seudia

Keu nan lembaga rab han ta patéh

Sunni peureuséh lagèe aswaja

Imam Syafi'ie han gli jituléh

Sit rôh ta patéh hana curiga

Meunan peurankap dua jap ampéh

Di jaréng abéh trôh biléh paya

Haba peuingat sahbat ngôn waréh

Ngön hatée putéh ikhlah lam dada

Hana meukeusut sinuet bang latéh

Hana sit maktéh sindée abuwa

Caé ka panyang bak sang ka abéh

Ka le that baréh hana seungaja

Deungön wassalam kalam geunaséh

Han jadéh lôn éh sambông keurija 😊

Wassalam

By: Cut Lém Mareujan

#CaeCutlem #CLMarjan #PustakaSastraAceh #DiakritikBahasaAceh

CIRI - CIRI

CIRI-CIRI

Saleum horeumat phon that lôn bagi

Keu akhi ukhti sampöe höe yang trôk

Izin lôn tuléh baréh meuriti

Buhu ulôn ci ujông i ngön ôk

Ramèe syedara meuputa puti

Ka keunöng taki bak awak ban trôk

Na awak teuka leuh bala geubri

Teuleuh tsunami jibagi pupôk

Meunyöe ta meungön ngön jih brat leupi

Saboh glah pasti kupi jitém jôk

Jisak aqidah hana leumah ri

'Ulama sunni leuh nyan jipeubrôk

Dakwah jih dudöe wah tanyöe bagi

Meuikat budi ngön da peulandôk

Ramèe that rakan tan geusadari

Sira wèng gari jis'ah seun béôk

Bacut lôn peugah bhah CIRI-CIRI

Mangat taturi yang kaka tundôk

Keu Ustadz Somad dijih that beunci

Lom Ustadz Hadi dakjeut jitumbôk

AA Gym saban gobnyan dicaci

Ustadz Arrazy han jitém anggôk

Keu Buya Yahya tanna jih sudi

Cuba peurati kon lôn peuantôk

Teutap han jitung bandum yang sunni

Seubab digunci ka jipasang yôk

Jeut-jeut WA grôp peulagôt tipi

Ceuramah bagi siuröe suntôk

Han jimeungaku kubu WAHABI

Beda nasabi sabée jitawôk

Tapi jikheun dröe kamöe nyöe asli

Kawôm SALAFI keudröe dijulôk

Peularha janggôt kheun ikôt nabi

Keunèng beumeuri itam meutumpôk

Meunyöe tan janggôt wah tôt keumiri

Cok imitasi bak kamèng landôk

Areuti sunnah jipeugah pasti

Anjuran nabi bandum jiadôk

Yang hana ikôt jidhôt ngön jibli

Kon umat nabi meunan dijuthôk

Padahai sunnah luwah areuti

Na sit tradisi meunurôt lubôk

Hana banbandum umum wah copy

Hana sit musti surban tangkulôk

Di Indonesia beda tradisi

Kupiyah peci na yang meutampôk

Na modèe bulat meuhat pih geubri

Ban teugku haji ramèe awak sôk

Kon hana "nyunnah" tapeugah anti

Tan luweu jeungki bulat meupacôk

Aurat beuteutôp ikôt ban syar'i

Somböng han geubri beuthat bajèe lhôk

'Oh nöe mumada rika lôn rawi

Nibak Pöe Rabbi lakèe peutunjôk

Dipat na salah meu'ah beu neubri

Maklum hai akhi kon ahli pakhôk

Koetaradja, 07 Jan 2022

By: Cut Lem Mareujan

#CaeCutlem #CLMarjan #PustakaSastraAceh #DiakritikBahasaAceh