🔥💫ORANGTUA-Z💫🔥
Assalamu 'alaikum saleum sijahtra
Keu rakan maya atau internet
Beusampöe bandum dusun ngön kuta
Geunantöe data ulôn blöe paket 😊
Doá lôntuan akan syedara
Grafik ngon kurva *MAKIN MEROKET* 😁
Sunggôh ibadat sihat anggota
Dalam useuha meutamah omzet
Tanging jameun nyöe contöe ka nyata
"Media Aja" geupeunan GADGET
Wajéb hareukat meuhat yah ngön ma
Ngön blöe kuota hana jeut atrèt
Demi keu aneuk wesbuk jeut buka
Instagram WA beujeut jipilèt
Keu buntok lolok tiktok beulanca
Bèk na kendala watèe jipeusèt
Wajéb berbakti bukti ka biza
Jinöe ka masa guda jép bandrèt
Jameun berbakti keu ureueng tuha
Jinöe meutuka keu GENERASI Z
Aneuk peurintah sanggah tan léi na
Peu yang jihawa wajéb tapeugét
Han tapeutimang sang darohaka
Payah tajaga hana jeut singét
Leuh nyan lom tugah tamah pusaka
Peusapat harta keu ucok butet
Hareum ngön haleu hana peu kira
Korupsi riba ngön capai target
Calon meulintèe bulèe goh nyata
Ka geuseudia di dalam mindset
Beutrôh keu cucöe jinöe geumita
Dak lôp penjara pih cilèt-cilèt
Meunan tradisi geubudidaya
Yang gohlom kaya beuna lam butget
Atôran Allah mudah talangga
Ka abéh masa jikheun tan apdet
Pajan ta thèe dröe dudöe teujaga
Dalam neuraca hana meuleset
Teurimöng 'azeub wab but di donya
Barôo tarasa hai ureueng chik Z
Ataghfirullah madah lôn rika
Seubab watawa geuyu lam but get
Leuh nyan watawa di dalam saba
Bèk neupeudesya nyöe salah inset
Tajak blöe beudak nibak suzuya
Tajak blöe saka bak supermaket
Hana tathèe-thèe ka watèe dhuha
Ulôn tôp rika daweut ka macet
Koetaradja, 20 Agt 2024
Wassalam,
🆑Ⓜ️🅰️RJ🅰️♑
#caecutlem #clmarjan #pustakasastraaceh #diakritikbahasaaceh #genZ #nenerasiZ
Tidak ada komentar:
Posting Komentar