GEUMPA DAN TSUNAMI
(Langkah Antisipasi)
""""""'''''"""""""""'''''''''"""""""""""""""""""
Assalamu 'alaikum bandum lôn sapa
Rakan syedara sigoë lôn jamak
Bacut peuneusan lôntuan rika
Kadang meuguna keubah keu sinyak
Teukeudi bak Poë tanyoë beuridha
Tugah useuha wajép tapeujak
Kaleuh tapubuet talanjut do'a
Tawakkal teuma ban Allah kheundak
Tanyoë meulindông payông Rabbana
Beujiôh bala sigala curak
Korban tsunami neubri syuruga
Kasép yang kaka keunoë neupeujak
Keu aneuk cucoë dudoë dibaca
Aneuk sikula phôn kanak-kanak
Wajép tapeutrôh keu sulôh suwa
Di dalam sastra haba meusanjak
Bumoë meuguncang geupeunan geumpa
Meujan sikada rasa meuhayak
Tapi nyang ladum meunyum that teuga
Dônya meugeunta tanôh dum reutak
Tanyoë beu ingat watèe hat geumpa
Teubit u luwa bèk duk lam barak
Meunyoë han mungkén na laèn cara
Miseu yup meja badan jeut tasak
Reulöh bangunan meunan taduga
Meuhambôo bata reubah deungön rak
Dalam meuratéb beusép useuha
Sira meudo'a teunang ngön bijak
Kadang lam moto tanyoë phôn rasa
Di ateuh honda atawa becak
U binèh dilèe tagèsèe sigra
Taprèh dang reuda barô löm tajak
Meunyoë teuga that meuhat meugeunta
Dalam seukala tacuba teubak
Jièk ie laôt patôt takira
Tsunami teuka kaleuh na jeujak
Nyang rap ngön laôt patôt waspada
Alarm tanda tanyoë geuyu jak
Bèk salah langkah arah tamita
Takira-kira tuju u pucak
Tapapah aneuk bèk gabuek cara
Hana ngön peu ba baplueng ngon tapak
Teukeudi takheun bak jeum sikula
Simulasi na bak guru bijak
Mumada óhnoë rampoë lôn puga
Kadang bahasa lôn hana lagak
Sastra indatu rindu lôn raya
Tiep-tiep kutika meuheut lôn hayak
Kadang na salah meu'ah keu hamba
Hana seungaja ulôn peurusak
Kritik ngön saran lapang lam dada
Ngön wassalama jaroë ulôn grak
Kuta Radja, 26 Desember 2010
By: Cut Lem Mareujan
Tidak ada komentar:
Posting Komentar