Assalamu 'alaikôm rakan lôn sapa
Saleum sijahtra rata peulosok
Saweub musibah wabah lam donya
Ka trép teurasa hana meurumpok
Bak pihak gaséh putéh lam dada
Deundam pih hana bacut meubukok
Sabéi teu-ingat keu sahbat dumna
Khusus pujangga "sastra ortodok"
Bak Allah sidroë geutanyoë pinta
Bala korona beubagah geucok
Teuleuh seumayang talayang doá
Deungon waqulja sama tapeucrok
Ungkôt lameuhan lam kawan kadra
Sajan meudoda deungon jeureubok
Lôn titép peusan saran lam rika
Buhu lôn puga ujông a ngon ok
Jinoë tanging trang lam realita
Deungon logika sang hana cocok
Naqli ngon aqli dali that caca
Tapi meubiza teumpat geuculok
Antisipasi solusi mita
Fatwa 'ulama trôh kiyai pondok
Alhamdulillah bagah keuluwa
Ngat bèk meuraba umat han cekcok
Seubab darurat meuhat teupaksa
Seutai et hôm ka area geu lock
Takut terpapar gencar lam haba
Tapi mengapa na ulok-ulok?
Tajak u peukan pakon han geunta
Tajeut beulanja trôh bak mie kocok
Duek keudèe kupi banggi han reuda
Sang-sang sit bala jeut gata rondok
Tajeut jak bak mall lagèe biasa
Mantong pèh cakra pakat meurumpok
Tamong ATM bak bèng pih lanca
Nyan pih meunyoë na jaroë talok-lok
Tapi bak jum'at meuhat meubeda
Sang-sang korona sinan nyang harok
Hanjeut jama'ah peugah bahaya
Neutém meudawa dali meupat cok
Bukon meukesut peunyinut lôn ba
Kon haba gasa seungaja lôn thok
Saléng peu-ingat meuhat watawa
Kadang meuguna bah pih lam cagok
Cuba tatanung reunung syedara
Peukeuh korona mata ka padok
Pakon meuseujid yang sit jimita
Mall deungon plaza hana paradok?
Bukon nit langga fatwa 'ulama
Kon ngon naggara lôn mita cabok
Kon keu peujabat lôn jungkat jungka
Peu lom lôn cuma (ibarat) guda pajôh lok
Meunyoë u mesjid goh nit tateuka
Bèk sit bak plaza rela tahók-hók
Meunyoë meunasah peugah bahaya
Nibak suzuya leubèh le nèk mbok
Teutap bak teumpat siat tasaba
Jarak tajaga hai buntok lolok
Meunyoë sit meugrit teubit teupaksa
Teutap waspada beu elok-elok
Meugah di wuhan mulaan teuka
Di nanggroë china sidéh tiongkok
Bagah óh leuh nyan ban sigom donya
Sidumnan teuga sanggop jigok-gok
Katrôh u matang geulumpang dua
Payah lôn gisa ulang geurugok
Putôh karangan timang bak poh sa
Kakeuh mumada disinoë lôn blok
Meugah krueng batèe na teubèe saka
Di alue naga peulara manok
Lôn lakèe meu'ah kadang na gasa
Ngon wassalama lôn rém meusinyok
-----
Astaghfirullahal 'adhiim...
Seharusnya kita berfikir, jika ke mesjid saja sudah tak aman apa lagi tempat lain.😭
Keutapang, 05.04.20
#CaeCutlem #CLMarjan #PustakaSastraAceh #StayAtHome #HanaBatat #HanaTungang
