Wahéi syedara, lôn cuba rika, di dalam nazam
Buleun hijriyah, deungöe lôn peugah, dua blah macam
Yang pertama phôn, wahéi e abôn, buleun MUHARRAM
Tanggai sa hai brôo, geukheun thôn barôo, ureueng iseulam
Teuleuh nyan SAFA(r), na tulak bala, adat ngön reusam
Peuget khanduri, jak binèh pasi, inöng ngön agam
RABI'UL AWAL, hana wah soal, tanyöe ka faham
"Buleun Molôd Phôn" di aceh abôn, meunan seubutan
Keu peut lam syair, RABIUL AKHIR,
wahéi pak salam
Nyöe "Molôd Teungöh", ramèe yang teu-oh, hana bizaan
Limöng ideal, JUMADIL AWAL, dalam catatan
Di aceh sarée, kheun "Molôd Akhée", meusajan-sajan
JUMADIL AKHIR, urutan hadhir, nibak leumbôi nam
"Khanduri Bugöng Kayèe", di aceh ramèe, geuseubôt meunan
Keutujôh RA'JAB, di dalam kitab, leumah tulésan
Di ureueng aceh, geukheun that fasèh, "Khanduri Apam"
Lapan ka jeulah, tan khilafiyah, sit buleun SYA'BAN
Di aceh teungku, nan "Khanduri Bu", di dalam lisan
Sikureueng maklum, puasa geukheun, buleun RAMADHAN
Nyöe buleun hamba, hana pat dawa, suci hana ban
SYAWAL keu siplôh, ramèe yang ratôh, geukheun Lebaran
Nyöe Uröe Raya, gembira ria, lulôh ujian
Buleun ZULQA'DAH, meuhat keu siblah, dalam urôtan
Buleun Meu-apét, seubab meucipét, ureueng aceh pham
Buleun sineuleuh, DZULHIJJAH nyöe keuh, lam rukôn islam
Ibadah Haji, yang na raseuki, wajéb tunaikan
Meu'ah lôn lakèe, bak bandum gurèe, musyaikhul kiram
Meunyöe na salah, neubrithèe bagah, bèk trép neupeundam
Teupat tanggai sa, buleun mulia, tuléh karangan
Salam 'alaikôm, sambôt saleum lôn, CUT LEM MAREUJAN
Koetaradja, 01 Ramadhan 1445 H
🆑Ⓜ️🅰️RJ🅰️♑
Catatan:
Nama-Nama Bulan Dalam Tahun Hijriyah Dan Dalam Bahasa Aceh.
01. Muharram = Asan Usén
02. Safar = Sapha
03. Rabiul Awal = Maulôt Phôn
04. Rabiul Akhir = Maulôt Teungöh
05. Djumadil Awal = Maulôt Akhée
06. Djumadil Akhir = Khanduri Boh Kayèe
07. Radjab = Khanduri Apam
08. Sya'ban = Khanduri Bu
09. Ramadhan = Puasa
10. Syawal = Uröe Raya
11. Zulka'edah = Meuapét
12. Zulhijjah = Haji
#clmarjan #caecutlem #pustakasastraaceh #diakritikbahasaaceh
