UNGGAHAN SESUAI UNDANGAN

Unggahan Sesuai Undangan

Hana halangan, kadang undangan, memang teubatah

Mit persiapan, ta maklum tolan, ubéna mudah

Kadang han sanggôp, taundang lam grôp, ramèe sileupah

Memang ka patôt, rot pintôo likôt, tameusháh-meusháh

Óh ban acara, video gamba, siat takeubah

Bèk langsông lam grôp, han cukôp2, bandum taunggah

Kadang syedara, sitalöe ngön ma, atawa ayah

Khanduri gata, meusikrak haba, hana tapeugah

Teuntèe jeut seudéh, hatèe meucuréh, na'uzubillah

Jikheun wab papa, gadoh syedara, mita yang meugah

Meunyöe yang kaya, dak kon waréh ma, undangan bagah

Wab dikèe gasien, dak saboh rabin, jianggap beuah

Meunyöe undangan, lam grôp teusimpan, hana masalah

Jeut grôp2 tajôo, foto video, saboh beureukah

Suai tan geujak, han mungkén palak, keu ureueng keubah

Seubab ka maklum, geu undang bandum, söe2 na langkah.

Lawét na WA, memang teurasa, na bacut mudah

Le yang fositif, sigöe negatif, nyan sit ka lumrah

Tapi bèk tuwöe, na syedara dröe, haté meudarah

Tijoh ie mata, wab tapeubiza, tingkat boyyinah.

Cut Lem Mareujan, geukarang nazam, kiban crah beukah

Söe2 yang keunöng, neuanggap mantöng, nyöe dalam madah

Walau irama, gaya bahasa, hana that indah

Teutap lôn tuléh, deungön haté gléh, karena Allah

Nyan ban...

Koetaradja, 05 Feb 2023

By: Cut Lem Mareujan

JAK MEUJAK

"JAK MEUJAK"

Meunyöe keu gobnyan, saboh turunan, tatém meulangkah

Udép ngön matée, hana tom tapreé, tamita ilah

Anggap FARDHU 'AIN, sidumnan yakin, sambông ukhuwah

Tapi keu tanyöe, mumada sidröe, diyu wakilah

Sikap di ulôn, pakon han ie crôn, meunyöe tan ikhlah

Bideung jak meujak, beusaban galak, meunan barôo pah

Bah pih jih kaya, udép mulia, jabatan meugah

Hukôm jih sama, hana meutuka 'AIN ngön KIFAYAH

Keu ureueng somböng, ta balah somböng, taniet seudeukah

Hanjeut tapuja, akai beulaga, lagèe nyan tingkah

Bak but meujilat, dilôn that luwat, yöe jipöe muntah

Ka meunöe sikap, hingga ka siap, dum söe jeut bantah.

Hudép lam donya, pasang neuraca, hana brat siblah

Gasien ngön kaya, hana meubiza, bak sisi Allah

Pakriban keu kèe, meunan ka teuntèe, lagèe nyan keu kah

Kon haba gasa, mangat teurasa, keu daweut mirah

Na bantah ? 😂

Koetaradja, 04 Feb 2023

By: Cut Lem Mareujan