A L M A N A K

*A L M A N A K*

Assalamu 'alaikôm kawôm syedara

Nyöe pat na lôn ba lada dicupak

Hana wah peugah salah ngön beuna

Jeut bèk neubaca meunyöe tan galak

Meunyöe tan pileg deungön pilkada

Hana pat mita siôn almanak

Dup imsakiyah buleun puasa

Meusidröe hana beurani cekat

Meujan han tatueng jibulung paksa

Trôh sirôp saka na awak peusak

Maka jih musém pileg pilkada

Ban sigôm donya leupah seumarak

But mubazirôn bak ulôn kira

Meujan bak lôn na saboh geureubak

Seubab awak nyan meulumba-lumba

Trôh bak-bak pala gamba tangkurak

Meunyöe trôh masa "ada maunya"

Bit jitém saba adak ta teunak

Tapi cuba ci óh kana meja

Dalam peunjara tanyöe jitém sak

Jama'ah aceh di arabia

Pèng jipeugisa rab saboh amak

Wab baitul 'asyi jibagi laba

Raya that jasa bak Habib Bugak

Bukon jabatan yang gobnyan mita

Bukon duk raja gopnyan keuheundak

Tapi bak ma'bud geutuntut ridha

Dipat ta mita jinöe lom hai pak?

Dicông bak meulu meusu cémpala

Bak binéh taka meusu beuruwak

Mumada 'oh nöe rampöe lôn rika

Nyöe kisah nyata kon haba hoax

Koetaradja, 31 Desember 2021

By: Cut Lem Mareujan

#CaeCutlem #CLMarjan

#PustakaSastraAceh #DiakritikBahasaAceh

PLOLITÉK JUDI DOMINO

JUDI DOMINO

(Meunyöe hanjeut jak beudoh dabôh2 mantöng)

Assalamu 'alaikôm kawôm sinaröe

Saleum lôn pupöe dari lam reugam

Bak layeu gusuk wesbuk pih sigöe

Dak jeut beusampöe trôh bak instagram

Ta meupolitèk ta tilèk nanggröe

Na bacut kutöe sit ka makanan

Meunyöe han tatém ta peulicén dröe

Tarasa keudröe but awak preman

Peureuséh hai friend meu'en dominöe

Dari phôn cawöe èk jôk keu lawan

Mita yang tuléh piléh awak dröe

Seubab bak si nyöe brat penentuan

Meunyöe phôn gop jak bèk sangak adöe

Peupass gop sigöe supaya aman

Meunyöe ta biyeu laju tasiböe

Jadéh wah publöe trôh luweu dalam

Meunyöe han sanggôp surôt u sagöe

Bèk yang na baköe meja ta geudam

Caröng seumeukée "kode" beu baköe

Bèk malah meulhöe seusama rakan

Bak itöng batèe pereulèe paköe

Èk peut jigamöe dua blah jitran

Laén jikira 'oh tamöng tanyöe

Balak nam awöe hana hitôngan

Meunan umpama haba lôn pupöe

Wab ka glak keudröe lôn nging piasan

Peugah gop peungeut padahai ngeut dröe

But yang na baköe sit "TUNJUK TANGAN"

Ta meupolotèk lisèk han jeut döe

Beuna ta tuhöe ngön söe meulawan

Nyata takalon bangön lawét nyöe

Mantöng klöe tulöe idiot meunan?

Awak ASN  jibrèn han jeut töe

Han jibri cawöe jikheun meuligan

Dak han jameun kon bukon lagèe nyöe

Yang planga-plongo han rôh dalam nyan

Beda politék dalam bilék dröe

Bèk peudeuh pungöe saboh turunan

Meunyöe mantöng na cara lagèe nyöe

Ka keuh legewo laén tan jalan

Meu'ah syedara gasa lam rampöe

Seubab cara nyöe na bacut aman

Meunyöe ta tuléh bahasa indöe

Bagah jituhöe tanyöe diancam

-----

Meunyöe hana jeut dan han sanggôp surôt, bèk meuramah rakyat wab bangai tanyöe.

Miseu but meu'en judi, lawan china lom... na peureulèe beujujur that sinan ? Hôm keuh hai...

Koetaradja, 25 Desember 2021

By: Cut Lem Mareujan

#CaeCutlem #CLMarjan #PustakaSastraAceh #DiakritikBahasaAceh