MAKMEUGANG - NYANG BEK ABEH AKAI

NYANG BEK ABEH AKAI 

(abeh peng biasa)

Sang makmeugie, sie makmeugang

Dang Keutapi, di Keutapang

Sang ngon pari, si ngon parang

Aseulang bari, aseuli barang

---------------------------------

Yoe si kilum, yum si kiloe

Jikheun baroe hana meuhai

Tapi lon nging bak uroe nyoe

"Pekgo" lagoe kheun si acai

Akhe tuleung, lon teumeung bloe

Bah beu asoe hana sagai

Lon kheun hawa sop hai adoe

Sigoe puwoe bawang bombai

Tasie itek mantong tanyoe

Keunong leumoe dilon gatai

Jiteubiet gluem kheun pak doto

Takot dudoe adoe kanjai

Sabtu minggu bak kalinyoe

Hana bak soe tapeugah hai

Hana teuhah pinto toko

Dak tapeutoe pajak gadai

Dimak sigam teukhem keudroe

Geu ngieng lakoe geumeu akai

Tapi maklum pakon meunoe

Ka geu iem droe asoe tirai

Harga diri ureung lakoe

Sithon sigoe beuna pangkai

Si makmeugang beugeupuwoe

Reusam meunoe dari awai

Kiban teuma hai rakan droe

Nyoe han meunoe jadeh bangai

Wab that meuhai yum sie leumoe

Payah meunoe lon meu akai

Saba adoe ......

Bna, 04.06.16

GET BAGI BACUT

GET BAGI BACUT

CL Marjan

Keu lon malam nyoe meunoe ramalan

Beda ngon beuklam kureung get bagi
600 triliyun jikeun peng kontan
Gohlom simpanan di lua nanggri

Aktiva teutap surat meugudang
Meunyoe piutang lanca han sakri
Seubab sep syarat watee jipinjam
Sita agunan nyoe jimeu ungki

Jumlah peugawee jithee u Jeupang
Inong ngon agam that manyang gaji
Han peu calitra leupah that seunang
Bak gamba kiban rumoh ka jadi

Neukalon beudeuh nyan meuh batangan
Padup boh sedan dalam garasi
Kon lon nyang foto teukabo badan
Meunan ramalan test.nan bak efbi

Soe meuheut peutoe phon jinoe beutrang
Soe nyang tem sajan teungoh meunoe hi
Bek laboo darah peugah peujuang
Watee kaleuh prang neulakee asi

Sigohlom sampoe meunoe ramalan
Dalam catatan lon simpan bukti
Neupeurab awai nilai tambahan
Lon bri balasan seureutooh kali

Jinoe that hawa keu sate matang
Teuma oh leuh nyan saboh glah kupi
Rukok panamah neutamah sikhan
Nyoe gudang garam jeut sit dak neubi

Soe tem paduli neubri meu utang?
Watee lon ka chan hana sapeu pi
Meunyoe lon tuwoe neupasoe koran
Peuget siaran di dalam tipi

Ha ha ha..... ceurita trillyun,
Bak ujong nya itu lho... qi qi qi

Bna.11.05.16

CL Marjan

DI ANGAN-ANGAN

DI ANGAN-ANGAN

Nyoe menyentuh watee lon eu
Pat jiteupeu menoe cucoeks
Nyoe tapeudoeng di lhok seudu
Padum bayeu saboh pondoeks

Ci neuhitong siat teungku
Teugon laju nyan boh tektoeks
Hana thon nyoe bah thon ukeu
Dang meuteumeu proyek lon coks

Mita proyek hek sigitu
Phon beu hayeu pangkai sogoeks
Nyan sit katan wahei abu
Meukeu breuh bu merek bulogs

Atau mungken oh pemilu
Beutateumeu mat bak tukoks
Keu tim sukses tadong dikeu
Pakat bahu su yu culoks

Nyoe atra nyan pih han mampu
Lidah julu beumeugeusoks
Keu tukang lieh mameh ngon su
Ucong bak ue sanjong beudoeks

Muka teubai leubeh hayeu
Hana sapeu habeh pokoks
Tiep2 watee lakee laju
Keu si anu pitnah beu doks

Meunyoe meunoe lon han mampu
Kakeuh bateu peuget pondoks
Adak saran leupah hayeu
Meunyoe tabeu pat taneuk coks

Sang niet nekat bak thon ukeu
Malu-malu pat meurumpoeks
Sabon muka han lei lon pleu
Hoe tapeukeu malee padoeks

Muka teubai pangkai jitu
Han jibantu jiwoe pokoks
Nyoe get nasib keubit hayeu
U lhok seudu ba moto kroeks

Hayalan tingkat rendah.... qiqiqi

Bna.10.05.16

CL Marjan

GALAXI TINGGAI LAM TAH

GALAXI TINGGAI LAM TAH

Dicong bak panah jisinggah cici

Meukeumat gaki meugiloe geutah

Jiteuka teulah peugah Apa Ki
Samsung galaxi tinggai dalam tah

Meuhajat kunjong Ampon Mak Ali
Kakeumong gusi pajoh keumamah
Gawat darurat teumpat teuraphy
Wab emergensi muka ka mirah

Ramee nyang kunjong gampong ngon pasi
Ramee famili keunan geulangkah
Seujak meulintee meuteumee kursi
Leubeh lom meuri syara meutamah

Tapi that seudeih lakoe Teih Aini
Geukeuneuk selfie bineh peuratah
HP katuwoe lam moto Carry
Lam tah meulaci sinan meukeubah

Reunacana beugeot upload lam efbi
Bak teungku waki supaya leumah
Meunan rancana beuna bukeuti
Geutem peurati ureueng musibah

Meutuka uteun bayeun laen hi
Meutuka rawi laen seujarah
Meutuka musem laen tradisi
Meutuka trendi didalam tingkah

Aleh peu lon prueh peukeuh wab iri
Masalah selfie karooh lon peugah
Tapi kon meunan rakan meuseuni
Kupeu taselfie bak gop musibah

Pubuet amalan iklan tabagi
Peuget promosi dalam ibadah
Meunyoe sanjungan harapan gop bri
Kateuntee fi'li hana ikheulah

Tapeuleuh layang dalam blang pasi
Karhet ateuh ie hancoo keureutah
Haba keuwayang baksang lon rawi
Dak sineuk sawi beuna faedah

Gantoe latihan ulang keulayi
Ka meuri gabi lon tuleh madah
Seubab lawetnyoe laloe seumeudi
Keunoe lam efbi jareung lon singgah

~~~~~ ‪#‎keugura_gura‬

Bna .27 April 2016

CL Marjan

WAWANCARA DENGAN MARWAN SHOW ACEH TV

Marjan Show eh salah MARWAN SHOW

Meureu oh leuh bak ate neuh neuci pandang
Sang ban leuh plueng ateuh ateung di teungoh blang
Katrep hana olah raga olah umpang
Sabtu baroe lon ci ujoe kekuatan

Jipakat lhoh puteh leusoh dang latihan
Kameuwet-wet ban keuneusep bak putroe phang
Seutodio dak dumna le hana ruang
Leupah ramee hana meunee jak reukaman

Tiba-tiba tan lon sangka jibrithee tan
Ka jipeutoe bak ulon nyoe yu meukalam
Group baroena NADARIA lon rasi nan
Tapi syara kon keutua dilon sinan

Kakeuh lon pròh broh-bròh putòh bak Dek Marwan
Tan na laen kakeuh Cut Lem keu sasaran
Jiwa seuni dak tan ahli rooh tapaban
Tabri arah bek meuramah salah jalan

Dilontuan aneuk agam ikot sinan
Lon peuturòt bek salah grop weng haluan
Peulalee droe nyang bek paloe deungon tuhan
Bek meulanggeh ateuh gareh bek tabangkang

Buet aneuk mit peuget nasyid sajan sajan
Alat musik han wah tijik na lam badan
Acapella jikeun cara lei awak nyan
Hana alat babah meuhat jicok keudram

Bak seupot nyoe lon nging keudroe ka jitayang
Singoh seupòt na meuturòt lom ji ulang
Halo-halo bak Marwan Show tamong peusan
Jikeun neunging nyang tashooting hai Pak Marjan

Ukuran lon ureueng gampong kajeut dumnan
Panee sama tanyoe teuma ngon biduan
Dokumentasi dalam Cidi ulon simpan
Saboh watee keu ileumee cok bandengan

Marjan Show eh salah... Marwan Show bek karu-karu.... ha ha ha

Bna, 24 April 2016

CL Marjan